Minister blong Infrastructure mo Public Utilities i talem se, projek blong rod long aelan blong Penticost i cost araon VT 5 billion.
Jay Ngwele i talem se, projek blong rod ia, China Civil Engineering Construction Corporation bambae i wok long hem.
Minister blong Finance mo Economic Management, Johnny Koanapo i talem se, kaontri i stap long wan State blong Emergency folem COVID-19 pandemic mbe hemia i nosave stopem ol projek olsem blong hapen.
Hemi talem se, kavman i mekem disisen blong ol projek i mas wok aot folem growth reit blong economic fokas long yia ia.
“ Nomata cost blong rod projek ia long aelan blong Penticost i diferen long ol nara aelan, ol pipol i mas save se kavman i stap spendem mani from pipol blong Republic blong Vanuatu,” Mr Koanapo I talem.
“ Everi rod hemi rod blong Republic blong Vanuatu mo hemia nao tinktink we fulap man i no kasem, oli tink se taem yumi mekem wan rod long Tanna, Malekula o Ambae hemi blong ol pipol long ol aelan ia nomo mbe in fact rod ia hemi blong ol pipol blong Vanuatu.
Wok blong rod projek ia bambae i stap long North kasem long South blong Pentecost.
Long wik ia, Minister blong Finance mo Economic Management, Johnny Koanapo, Minister blong Infrastructure mo Public Utilities, Jay Ngwele mo General Manager blong China Civil Engineering Corporation, Liang Qing, oli stap tugeta mo saenem agrimen blong konstraaksen kampani ia i save go hed blong wok long projek ia.
