Vanuatu i plan blong i kivim aot COVID-19 boosta stik; wan extra stik i ko nomo long ol prioriti grup olsem ol frantlin wokman.
Acting Director blong Public Health, Dr Jenny Stevens, i talem se plan ia i folem apruvul blong National Immunisation Coordination Committee mo Helt Technical advisory grup.
“Hemia blong ol prioriti grup nomo olsem olfala blong yumi we oli gat sik long bodi blong olgeta finis olsem sik suka mo hae blad presa, ol helt wokman, ol nara frantlin wokman olsem olgeta long boda, bus draeva, ol hotel wokman. Mo tu ol pipol we oli wantem travel i ko ovasi tu oli mas karem nambatri stik,” Dr Stevens i talem.
Dr Stevens i talem se naoia we i stap kavman hemi no redi blong givim aot boosta dose long evriwan.
World Health Organisation i talem se boosta dos hemi blong helpem immune sistem blong wan pesen i faet akensem COVID-19.
Dr Eunyoung Ko, World Health Organisation Liason Ofisa long Vanuatu i talem se klinikol triol i soem tu se boosta shot i help bigwan preventem ol man we oli sik bigwan long COVID.
“Evidens i soem se boosta shot bae i helpem imune sistem blong wan pesen we i tekem finis tu COVID vaksin stik,” Dr Ko i talem.
“Namba tri dos blong vaksin o wanem wol health organisation i singaotem boosta dos, evidens i soem se i protektem mo helpem ol soldia (antibodi) insaed long bodi i faet akensem eni virus.
“Boosta dose ia bae i helpem tu bigwan ol protein blong faet akensem omicron virus. Kwesten we i stap se sapos yumi tekem mo afta long faev-six manis bae yumi tekem bakegen wan narafala boosta dos o no. Mo bae mi talem se risej we ol scientist anda oli mekem hemi stap ko hed mo bae i gat jenis taem yumi stap ko. Olsem mi bin talem finis se ol narafala kaontri oli statem finis ol boosta dos ia, mo oli kipim trak long immuniti long ol pipol ia mo sapos i stat blong ko daon, ten kavman blong olgeta bae i stat blong lukluk long ol nara stik bakegen. Semak samting i save hapen long Vanuatu.
Long ol pipol we oli tekem Sinopharm mo Astrazeneca oli save tekem boosta shot blong olgeta afta long faev kasem six manis mo olgeta we oli tekem Johnson mo johnson vaksin, namba tri stik bai i hapen afta long tu manis nomo.
