Ol frantlin wokman i tekem namba tri stik blong COVID-19 tete long Port Vila.
World Health Organisation Liason Ofisa, Dr Eunyoung Ko, i talem se stik ia i blong helpem imune system blong wan pesen i faet akensem wan virus.
“Evidens i soem se stik ia bae i helpem bodi i kam moa strong akensem ol niufala virus blong COVID olsem Omicron,” Dr Ko i talem.
Charter Coordinator blong Air Vanuatu, Yano Albert, i talem se hem olsem wan frantlin wokman blong Air Vanuatu i hapi blong tekem namba tri dos ia.
“Mi tink se bae mi mas tekem boosta dos(Nambatri stik) from mifala ol frantlin wokman blong Air Vanuatu,” Mr Albert i talem.
“I jes kat wan awenes nomo we olgeta blong Health i kondaktem wetem mifala blong mifala i mas protek long ol virus blong COVID we i stap ko raon naoia.”
Dr Jenny Stevens, Acting Director blong Public Health, i talem se namba tri stik meresin ia i blong ol prioriti grup nomo.
“Ol prioriti grup ia hemi ol olfala blong yumi we i kat sik vinis olsem sik suga o hae blad presa, ol health wokman, ol nara wokman we i stap long boda olsem ol bus draeva, olgeta we oli wok long ol hotel,”Dr Stevens i talem.
“Yumi long Vanuatu we stap travel i ko ovasi, mo kmbk bae hemi wan risk so grup ia tu i mas tekem boosta dos ia.”
Ol frantlin wokman ia, health, Airports Vanuatu, Air Vanuatu, Customs mo Immigration i tekem COVID stik ia redi long ol repatriation flaet we bae i stat long wiken ia.
Ministry blong Health i talem se boosta dose ia hemi blong nomo blong ol frantlin wokman mbe oli no redi yet blong rolem aot long ful populasen.
Plan we i stap hemi blong mekem awenes fastaem long ol booster dose ia bifo oli stikim pablik.
