Kavman bae i help pem lease blong Boeing 737.
National airline hemi konfemem se i kat bigfala aotstanding lease i stap we i bin i stap longtaem blong COVID.
Be oli no rilisim eni fika long amaon ia.
Chief Executive ofisa blong Air Vanuatu, Atu Finau, i talem se kavman bai i help blong putum mani blong pem aotstanding fi ia.
“Taem i kat threat long lease blong Boeing 737, airline mo lessor oli agri long wan temporari plan we bai inkludum kavman sapot blong katem daon bigfala kaon ia we i bin inkris long taem blong COVID,” Mr Atu Finau i talem long wan press statement lo wik ia.
VBTC hemi kasem informesen long ol reliable soS se lessor blong Boeing 737 i kivim kasem en blong yia ia nomo blong sotem aot ol aotstanding.
Be national airline i pointem aot se wetem disolusen blong palamen bai hemi wan jalenj blong aksesem funding sapot long kavman.
“Vanuatu kavman hemi bin mekem ol faenansol agrimen blong provaedem dept relief long national airline” Mr Atu hemi talem
“Ol kavman ia oli endorse finis tru long council blong ol Minista mo oli saenem bifo we kavman i disolv.
“Be wetem disolv ia, bai implementesen hemi expek blong kat sam complikesen mo dilei.
“Long rikwes blong airline, Praem Minista mo ol stek holda oli agri blong mit wetem bod blong diskasem ol mata ia.”
Airline hemi kat wan rIkavari plan we i stap inples sins 2021 we oli stap wok lem, folem blong rikava long COVID pandemic.
Ol plans ia hemi includum niu aircraft blong sapotem domestic fleet, mo oli sud kasem kaontri bifo yia ia i en.
