Department blong Biosecurity Vanuatu i banem impot blong ol fawl long Victoria, Australia long manis ia folem spred blong wan sik blong bird flu.

Dr Roger Philips long Biosecurity Department i talem long VBTC se Avian Influenza i wan sik blong fawl we i save pas tru long air mo eni fawl i save kasem espeseli taem fulap fawl i stap insaed long wan haos  from hemi spred ariap.

Hemi talem se from resen ia nao, Department blong Biosecurity i mas akt kwiktaem blong protektem boda blong kaontri mo stopem sik ia blong no kam insaed.

“ Tabu ia i no minim se hemi blong ol komisel poltri fam nomo mbe hemi blong lukaotem tu ol lokol faol we ol pipol i lukaotem long ol komuniti,” Mr Philips i talem.

“ Yumi mas protektem boda blong yumi from bird flu i save kam wan ekonomik disasta.

“ Aotbreak blong sik ia i bin detek long Australia long namba 31 blong July mo ol othoriti i bin letem ol poultry impota i save long hem mo hem ia nao mifala mas putum ban ia.

“ Bird flu ia i save spoilem laef blong ol narafala pijin tu olsem dakdak mo nara moa.”

Dr Philips i talem se tabu ia hemi blong Victoria state nomo mbe ol nara state olsem Queensland, New South Wales mo South Australia i oraet blong Vanuatu i impotem ol fawl long hem.

Tabu ia bae i stap kasem taem we state blong Victoria i klia.