Vanuatu Depatmen blong Meteorologi i gohed wetem woning blong flading truaot long kaontri.

Long aelan blong Efate isu blong flading long Manples eria i kosem sam pipol blong mas muv aot iko long difren ples.

Wan aos mo yad weh wan taem i shelterem wan famli i empti stap folem ongoink flad weh heavy rain i stap kosem long eria ia.

Isu ia i bigwan folem amaon blong wota weh i stap ron mo ko insaed long yad mo aos blong ol residen lo eria ia.

Wan elda blong SDA jej, Mr Lowen Taka, weh i liv long eria ia i talem seh problem blong propa drainej long wan cemen rod projek weh i lid iko antap long Kokoreko i stap kosem flading long olgeta long taem blong hevu rein.

“Hemya mein rod antap ya hemi blong olgeta long Kokoreko, from akses blong ko antap long rod ya i nokut, ting ting hemi strong blong mekm rod i ko antap so spos i kat wan smol availobol fand weh i stap tru long ol MP o ol politisen weh oli wokem ya, i no kat wan gudfala visibiliti stadi blong pointem aot stret seh rod ya bae hemi olsem wanem o hao nao sos ol wota ya hemi kam daon bae hemi ko wea? Mifala i luk oli wokem i finis ol man oli klad long taem i sun rod i gud beh taem rein taem hemi wan narafala stori.”

Hemi kontinu blong talem seh taem wan projek blong rod weh kavman i wantem mekem bambae oli mas lukluk bigwan long visibiliti blong hem blong avoidem isu olsem weh layaot blong rod ino kat propa drainej mo saet weh bae wota iko long hem.

“Rod weh i stap naoia long Lumpukuti i kam daom long wei , i mas kat wan gudfala visibiti stadi mo umi no onli lukluk long rod, yumi mas lukluk long wota ya bae yumi muvum o seftem i ko wea? from blong tok stret isu ya hemi no saveh stop. Spos rein hemi stap blong wan aoa hemya mifala sori mas faenem ol samting putum ol samting antap o klaem antap, muvum iceboks i ko antap kasem taem ples hemi drae.”

Heavi flading lo eria ia folem cemen rod weh i direktem bigfala wota iko long aos blong ol pipol long eria hemi wan ongoing isu long olgeta.