Vanuatu Nasonal Meteo Ofis i runem wan klaemet stadi we i soem wan hae janis blong yia 2024 hemi moa hot bitim las yia.

2023 hemi karem rekod olsem wan yia we hemi hot bitim ol nara yia.

Long Vanuatu las yia yumi lukim wan hae inkris long tempreja blong 26 dikris selses mo hemia hemi bitim nomol tempreja blong kaontri evri yia, we hemi 24 dikris nomo.

Prinsipol Saentifik Ofisa blong Klaemet Divisen, John Ruben hemi talem se klaemet jens mo El-Nino hemi olgeta mein kos blong hae inkris blong tempreja ia.

“Hemi no wan gud nius, hemi wan samting we yumi mas help blo daonem carbon-dioxide (rabis smok long envaramen) we hemi stap mekem klaemet jens,” hemi talem. 

Mr Ruben hemi talem se hemia i save kosem ol bigfala weta ivent olsem ol strong saeklon, longfala drae mo wetwet sisen, hae namba blong sik, toti wota mo hae tempreja i karem tu niu bebet i kan long kantri mo sik.  

Hemi tok moa se wan nara mein rison blong hae tempreja inkris hemi period blong El-Nino o blong dry weta long sam manis i kam.

“Yumi gat wan El-Nino (dry taem) hemi stap in place,” hemi talem.  

“Mo ol klaemet saentis oli stap projectem se bai hemi moderet lo 2024 bai hemi karemaot rikod blo 2023.”

Vanuatu hemi jes lego tri wet sisen (El-Nina period) blong hem las yia, we i bin stat long 2020 mo folem nomol klaemet kondisen, tempreja hemi sud go daon afta long wan La-Nina period.

Be Mr Ruben i talem se wetem ol data mo risej, i gat low janis blong ino save hapen.