Ol kava produsa i stap ekspektem wan shortej blong kava from ol impak blong Tropikol Saeklon Lola.
Market blong kava long Anabrou hemi wan ples long Port Vila we ol fama long ol aelan oli save sendem kava blong ol, blong oli save salem i ko long ol nakamal wetem ol pipol.
Be naoia i stap, ol kava produsa i talem se bae i gat wan shortej blong kava we i kam long Pentecost mo long Malekula.
Tufala aelan ia hemi ol mein aelan we i bin kasem wan bigfala impak long saeklon mo from hemia ol mein krop blong olgeta olsem kava i bin damej.
Wan venda blong market long Anabrou, Melody Mabon, i talem se Pentecost i stap fesem sam had taem naoia, mo hemi lukim se sam fama wetem ol venda blong kava bae save lusum incom.
“Mi mi luk se bae hemia bae affektem mifala plante, from se mifala i luk se kava ya nao i stap mekem mani, blo mifala i save putum ol pikinini i ko long skul mo eni narafala samting we mifala i nid blong pem, mani blong hem i kam from kava,” hemi talem.
Hemi talem se fulap pipol i putum mo prioriti long survivol afta long saeklon.
“Oli no lukluk plante long kava, be oli lukluk long laef blong pikinini, mi minim se, olsem kava oli no tekem tumas taem long hem, be oli wantem se ol haos blong ol pikinini i mo sef, or wata blo olgeta i mo sef bifo oli go bak ol graon blo business blo kava bakeken.”
Wan venda we i stap usum kava blong Malekula i talem se saeklon bae i effektem bigwan amaon blong kava we i stap kamaot long aelan ya.
“Damej i bigwan, we i bigwan, ol lif i foldaon, mo kakae tugeta i nogud,” Loren Obed i talem.
Mo Fes Backet Nakamal long Anabrou, i lukim wan shortej blong kava finis, mo wan woka blong nakamal i talem se i gat wan shortej finis be oli stap weit long ship nomo.
“I gat wan shortej blong kava, mo from saeklon, i mekem se long saed blong transpotesen i slow blo kava i kam long Vila, ating samwhere raon long 1 dei or 2 dei, bae mifala bae save salem ol kava blong mifala,” Christion Sale long Fes Backet Nakamal i talem.
Fulap long ol venda, i talem se TC Lola hemi maj mo nogud bitim Harold, Judy mo Kevin, mo oli talem se bae i tekem sam taem blong evri samting i save kam bak gud.
