Pipol blong wan eria blong Not Tanna oli askem Tafea provinsol gavman mo Nasenol Disasta Managemen Ofis blong helpem olgeta.
Hemi folem ashfall we i kamaot long Yasur Volkenu.
Wan tribe we oli singaotem, Natiawas, i talem se situation ia hemi kam bigwan long vilij mo komuniti raon long eria ia.
Jeaman blong Disasta Komiti long Naka eria mo representif blong tribe ia, Mr Joe Takeiu, i talem se pipol long komuniti oli feisem hat taem lo saed blong kakae mo kat akses long wan gud mo clean wota.
Mr Takeiu i talem se long beginning blong las manis oli stap manajem smol kakae we oli kat long karen inklutum tu olgeta kakae we NDMO i bin kifim, be kasem long manis ia pipol long komuniti i nomo kat inaf saplae long olgeta kakae.
Hemi talem se oli nidim help long provins blong i save rilifim olgeta kasem taem we oli karem wan mo help ikam long nasenol gavman.
Acting provincial disaster ofisa long Tafea provins, Mr Taio Johnny, i talem se folem rekewst blong komuniti ia bambae ofis blong NDMO, bai i respone long nid blong olgeta citizens blong Tanauta espeseli nao komuniti blong Naka mo Natiawa tribe long eria blong Not Tanna.
Mr Johnny i talem se ofis blong NDMO i setup long Tafea provins purposely blong monitarem olgeta natural disasta we i stap happen truaot long Tafea provins mo tu blong sapot mo asistem olgeta pipol.
