Ol outer aelan i resem komplen blong olgeta folem pua seves blong Air Vanuatu.

Area Secretary blong East Santo Council, Angelo Wass i talem se pua seves blong ol flaet we oli stap fesem naoia i rili afektm ol lokol bisnis we oli depend bigwan long ol turis.

Mr Wass i talem se naoia flaet blong Air Vanuatu hemi nomo consiten olsem bifo we festaem oli stap kat flaet kolosap evri dei long wan wik.

Hemi talem se be naoia flaet naoia hemi ko daon long wan mo tu taem nomo.

“Fulap long ol pipol oli mas dilei long ol wok travel blong olgeta folem isu blong seves blong national airline,” Mr Wass i talemaot.

“Long pas 9 yia, Air Vanuatu hemi bin ranem wan gud transport seves long Laman Bay kompea long yia ia we i drop bigwan mo afektm ol pipol long side blong business traveling,”  Orah Jack we hemi stap olsem Air Vanuatu agent long Laman Bay i talem long VBTC Nius.

Isu blong domestic seves blong National Airline hemi expek blong inkris folem namba blong domestic fleet we i ko daon, mo ol pilot we oli leko kampani.

VBTC hemi stap ko hed yet blong kasem wan komen long Managemen blong airline we Chief Executive Ofisa, Atu finau i lidim.

Long last wik National Airline hemi lusum Twin Otter AV12 we i bin stap sevesem kaontri blong six yia, hemia from ol unpaid lease.

Naoia i kat two Twin otter nomo, AV11 mo YJ10.

Be i kat risk se bai oli lusum Twin Otter AV11 folem court case we i stap ko hed naoia, Owner John Pechan, hemi stap kleim se airline hemi no wantem folem ol agrimen blong pem plane ia.

Long wik ia news paper i ripotem se i kat kanselesen blong fulap flaet folem risen se i nogat enaf staff.

VBTC hemi bin ripotem long July finis shotej blong ol pilot we i bin kosem ol kaen kanselesen olsem.

Reliable sos oli rivilim se moa pilot oli expek blong resign from oli no hapi long karen operation blong national airline.

I kat fulap komen i kamaot long social media we oli askem strong airline blong impruvum seves blong hem.

-Jamie Brown, Trainee Journalist.