Air Vanuatu i wet blong kasem apruvul blong statem ol niufala schedule flaet blong repatriation.

Paul Pio, Manager Marketing mo Communication ofisa blong Air Vanuatu, i talem se oli sabmitim ol helt protokol dokumen blong olketa finis mo naioa oli stap weit nomo long National Disaster Management Office blong apruvum.

Hemi talem se, taem oli apruvum bae mifala i save putum ol niufala schedule blong ol flaet.

“Ol helt documen plan ia we mifala i sabmitim i folem standard blong ova sea,” Mr Pio i talem.

Spokespersen blong COVID-19, Len Tariovonda i talem se, Ministry blong Health bae i lukluk long plan ia fastaem, bifo National Disaster Management Office i apruvum.

Hemi talem se hemi rili impoten blong lukluk long hem.

“National Advisory Committee blong COVID-19 i mekem sam proposol long wok blong Air Vanuatu mo bae oli mitim ol representativ blong National Airline long tete,” Mr Tarivonda i talem.

“Ministry blong Health i bin provaedem plante komen long plan ia we Air Vanuatu i sabmitim,  mo finol miting i stap tete wetem Air Vanuatu mo afta long hem, Ministry i sud apruvum mo saenem bifo hemi sabmitim i ko long National Disaster Management Office blong apruvum.

“ National Advisory Committee blong COVID-19, i stap infomem ol pipol konsen se afta long wok ia, bambae oli mas lukluk tru tu long plan flaet blong Air Vanuatu.”

Mr Tarivonda i talem se hemia i blong kivhan blong mekem sua se everi flaet i mas tekem 170 pipol nomo mo no ova.

Laekli bae i kat tri flaet long wan wik nomo.