East Epi andawota volcano i wan active volcano naoia.
Volcano Scientific Ofisa long Geo- Hazards Dipatmen, Dan Tari i talem long VBTC Nius.
“So andawota volcano blong East Epi hemi wan Dormant volcano(hemi quite mbe hemi save muvmuv long fuija). Erapsen i bin hapen long 2004 mo hemi stap kwaet mo naoia hemi kerap bakegen. So naoia hemi kam olsem active volcano naoia,” Mr Tari i talem.
“Hemi nomol blong volcano i hapen olsem long graon mo solwota. “Taem i kat moa aktiviti insaed long jemba blong wan volcano, magma hemi kam antap wetem gas mo i nidim blong hemi mas rilis; Hemi mas rilis. Blong yumi rikodem long history blong erapsen, ating muvmuv long moning ia nao hemi bigwan we yumi save.
Pipol blong Nul vilij long Saot Epi i talem se andawota volcano blong East Epi i muvmuv bakegen long aftanun ia.
“Haf pas 5 ia taem erapsen ia, ol pipol i kam stanap mo wajem bigfala smoke i stap ko antap; Hemia long haf pas 5 long moning taem earthquake i ko vinis ia. Ol pipol i wajem ol black smoke ale smoke ia i ko waet olsem ol klaod ia. I kam long 11 o;klok -12 0’klok ia volcano i ko daon mo slo i stap. Naoia long 4o’klok ia hemi muvmuv bakegen mo i kat wan nara hole bakegen mo mifala i luk nomo i waet i ko kamaot i no long semak ples mbe nara ples bageken we bae yumi se 20-30mita olsem ia longwe long fes wan,” Eria Secretary blong Saot Epi, Timothy Andre i talemaot long VBTC Nius.
“Mifala i stap antap long bush mo stap wajem i waet nomo i ko antap. Hemia wan samting we hemi festaem blong pipol long Epi i luk, oli stanap mo stap tinkbaot situasen blong Ambae mo oli stap talem se sapos yumi olsem ia bae yumi stat blong muv nao. Fulap i kat ol negativ tinktink nao blong stat blong muv. Mifala i stap talem long olgeta pipol blong no ko daon long solwota mo no ko kolosap long hem. Yumi stap antap nomo mo stap wajem i ko daon.
“Mbe long eli moning pipol i rili fraet from oli luk ol bigfala dak smoke we i no longwe long mifala. Mifala i dipen bigwan long ol otoriti blong talem wanem blong mekem.”
Mr Tari i talem se from volcano i stap long solwota, hemi putum sam nara disasta tu.
“So wan hemi tsunami, volcanic gas mo acid ren,” Mr Tari i talem.
“So acid ren bae i dipen sapos gas blong volcano i kamaot bigwan hemi folem wind direksen i ko long wanem ples mo long taem ia we ren hemi form, hemi ko tru insaed long klaod blong gas ia i minim se bae hemi kosem acid ren long ol ples long ol aelan. From hemi stap daon long solwota taem hemi muvmuv, bae hemi mekem wave i kasem ol coastal eria blong yumi. So i kat ripot vinis long moning, ol pipol raon long east blong Epi oli se oli luk sam wave folem explosen. So fraet blong yumi naoia hemi blong pipol i stap alert oltaem from nogud hemia i mekem wan nara bigfala aktiviti. So threat blem wetem tsunami folem earthquake.”
Mr Dan i talem se i kat tu andawota volcano long Vanuatu.
Wan hemi East Epi andawota volcano mo nara wan Kuwae we i stap bitwin Epi mo Tongoa.
