Mr. Albert Nalpini, Acting Human Rights Coordinator blong Vanuatu, i bin toktok long VBTC Talkback Show long topik “Pawa Blong Vote.” Hem i talem se ol kandidat oli mas campaign blong pruvum ol policies we bambae oli wokem sipos oli kasem ples insaed long gavman. Hem i makem klia se yumi no mas campaign blong putum pressure long ol man blong mekem decision we i no kam long freedom mo choice blong olgeta, from hem i agensem polotikal raet blong wan individual.
Mr. Nalpini i talem se ol loa olsem Leadership Code, Penal Code, Election Act, mo People’s Representation Act oli stap blong protektem ol raet blong evri man. Hem i askem long ol pipol blong stap long gudfala fasin mo rispektem raet blong narafala man long taem blong campaign, taem blong vote, mo afta long vote.
“Evri man long Vanuatu i gat raet blong vote long hu nao hem i wantem,” hem i talem. “I no gat man i save fosem narafala blong vote long wan kandidat, from ol loa blong kantri oli stap blokem ol fasin olsem.” Hem i emfasem se yumi evriwan i mas rispektem decision mo freedom blong evri man blong votem hu nao hem i ting se i stret.
