Beach Volleyball Tim blong ol Men i eim blong winim wan medal long Pacific Mini Gem long Northern Mariana long June.

Hed Coach blong tim Vanuatu, Malon Poilapa i talem se hemi trastem ol pleia long trening blong olgeta.

“Tufala boy i impruv bigwan long saed blong training, training proses blong mifala i stap mekem sam dril blong advans mo strenghtenem ap ol skil blong tufala boy we tufala i stap pripea i ko from mini gem,” Mr Poilapa i talem.

“I gud tumas blong luk ol yangfala i glad blong tekem pat insaed long ol spot disaplin mo ripresentem kaontri blong yumi. ”

Tufala pleia ia i gat Stivano Banga mo James Chilia.

Vanuatu Volleyball Federation i talem se wetem Pacific Mini Kem long neks manis, bambae oli yusum competisen ia olsem wan priperesen i ko from Common wealth kem long July.

Stivano Banga i talem se trening blong olgeta i ko from gem hemi tough be hemi trastem patna blong hem long trening.

James Chilia i talem se i no kat tumas kompetisen we tufala i tekem pat long hem be i kat bigfala eim long gem.

Vanuatu Volleyball Federation bai i sendem Fo bij volibol pleia i ko long Northern Mariana gem, tu woman mo tu man bij volibol pleia.

Tu woman ia hemi Loti Joe mo Bella Lawac long tim blong olgeta woman.

Loti mo Bella i stap tren long Australia anda long nasonal coach blong Vanuatu, Steve Anderson.

Beach Volleyball Competition ia bai istap long June 20 kasem 24.