Fes repatriation flaet bae i hapen long wiken ia.

Disisen ia i kamaot afta long miting blong Health Emergency Committee i no longtaem folem ol risk asesmen we Health Technical Tim i mekem mo faenem se risk i stap ko daon.

Acting Director blong Public Health, Dr Jenny Stevens, i talem se fes repatriation flaet blong Auckland, New Zealand bae i hapen long February 12.

Dr Stevens i talem se afta long flaet blong New Zealand ia bae i kat ol nara wan blong New Caledonia, Australia mo Fiji.

Hemi talem se naoia ol flaet blong New Zealand mo New Caledonia bae i ko hed nomol.

Health Emergency Committee i bin saspendem tufala repatriation flaet blong New Zealand mo New Caledonia folem spread blong COVID-19 virus, Omicron.

Ova 100 Ni-Vanuatu Seasonal Wokman we oli pat long Recognised Seasonal Employer scheme long New Zealand bae oli kam long ol repatriation flaet ia.

VBTC Nius i kasem toksave se plante long olgeta i ko wok long New Zealand long 2019 vinis.