Vanuatu Ferry i stap long 48 haoa kwarentin long Port Vila Harbour.

Lloyd Fikiasi , Legal Ofisa long Maritime Regulator, i konfemem wetem VBTC Nius se ship bae i aot i ko long Tanna long wik ia mbe i mas folem ol COVID rul we Maritime i putum blong kwarentin blong tu dei.

Mr Fikiasi i talem se ship bae i ko long Tanna wetem ol cargo.

Vanuatu Ferry i konfemem se oli bin folem rul blong aplae i ko long Maritime mo Health.

Vanuatu Ferry i konfem se i kat seven crew long ship we oli tekem COVID vaccine. Oli talem se taem oli kasem Tanna bae COVID tasfos tim nao i direktem olgeta long hao blong tekem aot ol cargo.

Vanuatu Ferry i talem se ol cargo ia i sud ko vinis long Tanna long February mbe from rabis weta mo komuniti transmisen i hapen long Jifs Dei i mekem se trip ia i dilei.

Vanuatu Maritime Regulator i bin isuem wan Standard Operating Prosija blong ol ship owna i komplae blong save kontinu long seves.

Acting Regulator blong Maritime Regulator, Kembro Manderson, i talemaot i no longtaem long COVID-19 health tok.

“Fes samting we mifala i mekem sapos ol ship i wantem aot, oli crew oli mas stap long ship blong 48 haoa(tu dei) bifo oli ko long ol aelan,” Mr Manderson i talem.

“Taem ship i kasem ol nara aelan, bae ol crew memba i unloadem ol cargo mo putum long wharf. Ol crew i stap nomo long ship mo alaoem ol client blong kam tekem aot cargo.

“Ol man we oli tekem parcel blong kam long Port Vila, oli tekem i kam putum long wharf nomo, ol crew oli lodem oli kam kasem Vila mo oli nosave unlaodem long semak dei. Afta long 48 haoa bae oli jes anloadem long ship.

“Sapos wan ship i wanetm aot, hemi mas aplae i kam long Ofis blong Maritime Regulator; i submitim Standard Operating Prosija, ten mifala i fowodem i ko long Ministry blong Health o health advisory, hemi apruvum ten hemi save aot.”