Ministry blong Health i extendem nara 48 haoa blong pipol i no muv araon long Efate kasem Thursday.
Minista blong Health, Honoroble Bruno Leingkone, i mekem anaonsmen ia long tete olsem apdeit blong 72 haoa lokdaon long Efate we i en tete moning.
Hemi talem se curfew ia bae i stat tete long 6pm.
“Ol niufala oda ia anda long Pablik health act emergency namba 6 blong 2022, i steitem ol strong mesa olsem, 48 haoa curfew hemi stap long Efate wetem offshoa aelan stat tete Tuesday 8 March i ko kasem Thursday 6pm kasem 6pm long March 10,” Minista Leingkone i talem.
“Hemia i minim se evri wan i stap insaed long haos blong olgeta long olgeta taem ia blong help katem daon spread blong COVID-19.
“Mi wantem talem tu se long taem blong 48 haoa curfew ia bae vaccine i saspen mo review afta nomo long period ia long Thursday. Long niufala oda ia curfew ia, i no aplae long olgeta we oli nidim health emergency seves , ol essentail seves provaeda bae oli operate olsem we minista i talemaot long fes oda long Saturday.
“Mi olsem minista blong health mi apil strong long bihaf blong kavman blong evri pipol Efate mo offshoa aelan i rispektem oda ia. “Mi apil tu long komuniti olsem ol jif mo ol narafala lida blong helpem Ministry blong rispektem oda ia.”
Plante man i konfus long curfew infomesen ia, mo Minista Leingkone i rispon blong talem se oli stopem vaccination blong man i no muv olbaot from kontact tracing operation i stap ko hed yet, mbe pipol i save go from kakae long maket mo ol nara impoten goods we oli nidim long dei taem.
Chief blong Staff, Superintendent Namen Kali, i talem se Vanuatu Polis Force bae oli executum oda ia folem nomol curfew haoa long 6pm kasem 6am.
Hemi admitim se i no posibol blong mekem wan curfew blong 48 haoa folem nid blong pipol.
Minista Leingkone i kol blong pipol i rispek mo no muv araon long taem blong curfew blong help stopem spread blong sik.
