I kat 44 patisipen anda long GRO prokram we Vanuatu Lab hemi okanisem wetem sapot blong World Vision we oli risivim VT100,000 vouchers blong statem agribisnis blong olgeta.

VLAB Projek Maneja blong GRO prokram, Dale Abel hemi talem se hemi wan projek blong 2 yia mo 6 manis blong givhan long ol mama mo yuts blong komuniti wetem ol woksop blong save hao blong mekem smol bisnis long saed blong agribisnis.

“Long yia ia, mifala mekem wan 6 manis incubesen trening long VLAB wetem 44 memba we ol mama mo yuts,” hemi talem.

“I bin kat 152 man we oli aplae kam blong joenem trening be mifala jusum 50 nomo, mo afta long ol woksop i kat 44 nomo we oli completem full trening blong olgeta kasem end blong prokram.”

Mr Abel hemi talem se oli givim VT100,000 ia wetem pepos blong ol patisipen oli kat janis blong  statem bisnis blong olgeta long saed blong planem kaikai, prosesem, salem mo winim mane lem.

“Mifala traem blong luk hao nao ba oli save bildim bisnis blong olgeta wetem bigfala mane ia olsem wan bisnis man o woman.

“Bisnis blong olgeta e mas wan agribisnis, hemi minim se eni samting we kamaot long graon mo oli mekem wan bisnis lem emi wanem mifala wantem sapotem.

“Plante long olgeta oli kam olsem ol fama long karen mo oli no save gud wanem nao emi agribisnis, be tru long woksop oli save se i kat fulap wei blong winim mane long graon.

“Mifala kat 8 coaches we oli bin sapot bigwan lo taem blong trening blong helpem evri patisipen blong lanem hao blong statem mo runem wan agribisnis lo stat blong trening kasem lo end blem.”

Mr Abel hemi talem moa se nekis yia ba oli mekem wan moa trening blong GRO prokram mo World Vision bae jusum 50 memba blong komuniti long narasaed blong kam joen mo bae oli save risivim vochers blong olgeta tu.

GRO prokram incubesen trening we European Union hemi fandem hemi stat long Jun 29 mo i klos las wik long Desemba 14.