Vanuatu Disabiliti Promosen mo Advokasi asosiasen (VDPA) pa emi okanisem wan wilbaro push long nekis wik lo Wednisdei namba 29 Novemba blong winim mane we pa kobak long ol pipol wetem disabiliti weh oli liv long Platinere.
Wetem bigfala sapot blong Vanuatu Sosieti blong Pipol wetem Disabiliti (VSPD) pa wokboat blong wilbaro push ya pa emi stat long 8 long moning mo finis long 1 long aftenun.
VDPA Inklusiv Offisa mo tu Platinere Komuniti Disabiliti Rep, Frida Willy we emi talem se pepos blong wilbaro push emi blong winim smol mane blong pem sam presen blong ol pipol wetem disabiliti we oli liv long Platinere mo from se disabiliti blong olgeta, oli nosave leko aos.
“Fulap long ol pipol wetem disabiliti we oli slip lo Platinere oli nosave wokboat, stanap longtime or kamaot long aos, so emi impoten se umi nao umi ko luk olgeta long aos blong olgeta,” hemi talem.
“Ol mama oli kat prokram blong olgeta mo tu ol yut long platinere beh umi traem mekem wan samting blong karem tugeta ol pipol wetem ol disabiliti tu.”
Pa wokbaot blong wilbaro push pa rounem gud Platinere kasem evri stage mo pa kat 4 stops blong 5 minits nomo we pa Renbow Tiata Grup mo VSPD oli kim out ol impoten awenes.
Pa oli stat kivim ol krismas presen long Decemba namba 3 blong selebratem Krismas mo tu Intanasenol Disabiliti Dei.
VDPA emi wan nasenol Disabel Pipol Okanisasen (DPO) blong Vanuatu weh emi stap anda long VSPD long Port Vila.
