Wan studen blo Avunatari hemi lusum laef blem long taem blo strong win blong Tropikol low we bin pasem kantri las wik long Wes blo Malo.
Nem blong yangfala gel ia hemi Yvone Boe Tohorua mo smol Dadi blong hem i konfem se long tete morning oli hidem body blong hem vinis.
Wan Tija long Avunatari Primary skul, Melinda Antas hemi talem se pikinini ia hemi kat 14 yia mo hemi wan niu enrol studen blong yia seven.
Infomesen we VBTC tim long SANMA hemi se, long Satete morning oli bin sendem Yvone i ko long stoa, mo taem hemi stap ko, strong win long taem ia i mekem wan coconut tri i foldaon long hem mo i tekem aot laef blong hem.
Hemi bin skul long klas 6 long Banaviti skul long last yia, mo long yia hemi just regista nomo long Avunatari skul, beh afta long fes wik blong skul hemi lusum laef blong hem.
