Vanuatu Aquatiks Federesen bae hemi sendem long manis ia, tu (2) yang swima blong hem blong ko tekem pat long wan narafala edisen blong Wol Swim Jamponsip long Doha, hemia long Qatar.
I kat Johnathan Sailas we hemi kat 21 yia mo Loane Russet i kat 18 yia, bae tufala i travel namba 2 taem nao long kompetisen bakeken long manis ia.
Sailas mo Russet, tufala i bin tek pat long semak Wol Jampionsip olsem las yia, long Japan.
VBTC sports i bin storian wetem tufala yangfala ia, mo tufala i talem se wetem patisipesen blong Vanuatu long las yia long Japan we hemi fes taem, mo tufala i lanem plante lesen long taem ia, mo long yia ia bae tufala I traem blong setem wan niu nasonal rikod blong Vanuatu.
Evidens mo Impact Ofisa blong Vanuatu Aquatics Federesen, Nerolyne Kapapa hemi talem long VBTC Spots se priperesen blong Jampionsip ia i stat finis las yia taem tufala i kambak long Pasifik kem long Solomon Aelan.
“Wetem olgeta priperesen blong ko long Doha, federesen hemi stap usum pool blong Holiday Inn long evri aftenun,” Mrs Kapapa hemi talem.
“Hemia i no fes taem blong yufala blong ko tekem pat long wan Intenasonal Wol Jampionsip olsem ia, hemi seken taem blong tufala long yia ia.
“Long sait blong olgeta man, Mr Sailas hemi bin setem wan rikod long sait blong olgeta man long 50 mita fri stael long wan taem blong 27 minit mo 78 sekens mo long 100 mita fri stael long wan taem blong 1 minit 2 sekens, long olgeta woman Loane i setem rikod blong 50 mita fri stael long 13 minit 47 seken, 100 mita fri stael long 1 minit 12 seken,” Kapapa i konfem ol nasonal rikod ia wetem VBTC Spots.
Mrs Kapapa hemi talem tu se wetem nasonal rikod we tufala i setem las yia long Japan, eim blong federesen long Wol Jampionsip ia long Doha hemi blong brekem olgeta rikod ia mo setemap wan niu nasonal rikod blong Vanuatu.
Mrs Russet i talem se hemi praod taem hemi ko stap ripresentem Vanuatu long wan wol steij jampionsip olsem ia.
“Mi glad blong ko tekem pat long yia ia bakeken from las yia hemi festaem blong mi mo mi lanem plante samting aot long ol narafala patisipen,” hemi talem.
“Hemi wan gudfala experiens blong mitufala long wan steij olsem, eim blong mi long Doha hemi blong lukluk blong setemap wan rikod blong mi.
“Mo i gud blong kompit wetem samfala top swima long wol mo tu hemi blong lanem moa long kalja blong olgeta.”
Mr Sailas hemi talem se bae hemi traem blong setem wan niu rikod long raon ia.
“Mi glad blong mi flayem flag blong Vanuatu long ovasi, mo eim blong mi long Wol Jampionsip ia, hemi blong setem wan niu rikod long sait blong olgeta man, mo long semtaem blong kaontri blong mi long sait blong swim,” Sailas hemi talem.
Bambae tufala i leko kaontri long Fraede wik ia i ko long Doha hemia long Qatar mo statem kompetisen long nekis wik.
