Sunday, April 14, 2024
24.8 C
Port-Vila
Sunday, April 14, 2024
More

    Wan mama we statem wan kindy skul long vilej blem we kastom no alaoem

    Blong selebretem Intanasonal Women’s Dei long yia ia wetem tim blong ‘Invest in Women: Accelerate Progress’, yumi tingbaot hao ol mama oli save kat hamas risponsibiliti be bae oli always putum pikinini fes wan.

    Kathleen Noklam hemi wan strong mama we i fesem jalenj taem hemi bilidim wan fes eva Kindergarten long vilej blem lo Suvemalau, Saot Santo, we kastom ino alaoem.

    “Hemi wan eria we kastom i strong mo oli no alaoem Jej, Helt mo Skul blong i kam long hem,” hemi talem. 

    Kolosap 20 yia nao we Mama ia hemi stap usum ol samting blong bush blong tijim ol studen blong hem.

    Hemi statem bildim skul ia long 2003 mo i stat wetem 3 pikinini mo hamas yia i pas, hemi bin helpem fulap pikinini blong lanem ol kala, hao blong kaont mo raetem ABC.

    “Insaed long vilij ia, i gat faev nasara we oli join mo stap tugeta wetem wan famili we oli no go long Jej.

    “Olgeta oli liv long laef blong bifo kasem long tete; oli no usum klos, ol man oli usum skin blong melek tri mo putum olsem calico ale ol woman oli usum lif blong nangaria blong putum olsem skirt be antap long titi oli no putum eni tink blong kavremap.

    “Oli liv simple oli no wari long Skul mo kakae from oli gat lokol kakae.”

    Mrs Noklam hemi wan woman Tanna mo hemi mared i kam long Saot Santo bush.

    “Mi Bahai faith mo mi luksave nid blong gat wan skul so mi statem smol kind skul ia wetem ol material we jej i givim.

    “Mi holem miting wetem ol Papa mo Mama mo oli agri be ol apu oli no agri i mekem se mi stap pray plante gogo ol pikinini oli stap kam.

    “Be taem oli kam mi kasem jalenj long fes bon boy we i stap sik mo blong six yia mi mo man blong mi mitufala i wokbaot wetem hem be tingting blong skul i strong nomo,” Mrs Noklam i talem.

    “I gat sam long ol studen blong mi naoia oli stap long yia 12-13 mo mi glad bae olgeta nao oli skul gud blong mekem developmen long vilij.

    “Mi usum Nature olsem riva, ol tri, ol lif mo ol samting blong bush nomo we i pulum interes blong plante pikinini.

    “I kasem long ples we apu we i stap mekem skin blong merek tri ia hemi agri blong skul i ko hed mo hemi bin mekem wan bigfala kakae blong talem long ol apu se mekem rod i klia blong skul i ko hed.

    Long saed blong usum ol materiel o samting blong bush, Mrs Noklam i usum sky aot saed long Science mo hemi mekem oli lukluk long ren, taem ren bae i foldaon mifala i luk saen long ol klaod, taem hemi black mo i fulap bae oli save se bae hemi ren.

    “Blong tijim Maths, mifala i lanem long saed blong karen, taem mifala i planem bean, pinat o corn mo save se long 3 wik taem bae ol lif i kamaot so mifala i kaont long hemia na.

    “Long English, mifala i lukluk long ol stori we i save givhan long ol pikinini, nomata wanem kaen bilih be hemi mas gat gudfala tingting.

    “Mo long saed blong Arts, mifala i pikim ap ol plant lif mo squeeshem sipos hemi red o purple be mifala lanem ol kala ia nao.” 

    Kindergarten skul we Mrs Noklam i statem long 2003 i ko kasem 2023 nomo afta hemi klos from we hemi mas muv i kam long Luganville town blong ol pikinini blong hem oli gat gudfala akses long skul.

    “Wanem mi bin mekem hemi voluntia wok, mi biliv se en blong laef long Wol ia bae Bigman i givhan long mi mo givim reward long neks wol,” Mrs Noklam i talem.

    “Skul hemi stop tu taem mi muv i kam blong faenem edukesen long town.

    “Yumi save se aelan blong Santo plante hill so taem mi bin stap tij, mi nomo save wokbaot longwe bakegen from evri taem skul i stat long haf 7 i ko vinis long haf past 12 long lunj.

    “Ale mi mas ko kasem garen antap long hill bae mi wokbaot 1 mo haf hawa bakegen blong ko tekem kakae blong kam kuk blong mifala long haos wetem ol pikinini we oli stap wetem mi from skul i longwe long ol haos blong olgeta, so ova 20 smol pikinini olsem oli stap wetem mi.”

    Mrs Noklam i glad se Papa God hemi save givhan lem nomata hemi no wan tija be hemi save gat save blong tijim ova 50 pikinini long 20 yia ia long remote vilij blong Suvemalao, Saot Santo we i gat faev nasara, Supermalao, Mokari, Vokavoka, Movosatao mo Forjenal.

    Long ples blong olgeta, blong kam kasem Luganville bae pipol i mas wokbaot wan ful dei blong kasem rod blong trak long saot Santo, ale jes kam long town long trak.

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen