Polis long Lakatoro i konfem wan ded blong wan transpot draeva tete long dei folem wan rod aksiden long Malekula.
Komanda blong Malampa, Davis Saravanu hemi talem long VBTC Nius se draeva i gat alegesen se hemi drong mo draev.
‘’Long tete raon long 11 o’klok kasem 12 o’klok, i gat wan transpot draeva hemi bin aot long wharf long Litzlitz blong karem sam cargo blong ko dropem,” Mr Saravanu hemi talem.
“Long wei blem i ko long Norsup, long wan ranabaot long Aop ia, draeva i mestem rod samples long plesia ia afta trak i kapsaed mo i slip antap long hem bakegen.”
“Wanem we i hapen ol Trafik Ofisa i kasem ples blong aksiden mo draeva ded long spot ia.”
Komanda Saravanu hemi talem se i gat tufala pasenja long trak mo wan wan long olgeta i konfem se draeva hemi drong.
Wan pasenja hemi oraet i stap mo nara wan nomo hand i brok afta hemi admit long Norsup hospital.
Eyewitness, Alroy Nato hemi talem se taem hemi stap draev blong ko long Lakatoro long 11 o’klok ia be hemi luk trak i kapsaed i stap.
‘’Draeva ia hemi wan midel man mo mi nao mi draevem hem I Kobak long hospital,’’ hemi talem.
Mr Nato i talem se man we ded hemi blong Central Malekula long Tautu.
