Offis blong Vanuatu Maritaim Sefti Atoriti (VMSA) hemi no hapi long pemit weh Depatmen blong Enviromen hemi mekem blong wok long ol sip long eria blong Port Vila Haba.
Hemia emi tru long wan petisen weh kansel blong Ifira hemi statem wetem aim blong putum wan stop long eni slipwei blong ol sip blong operet insaed long Pot Vila Haba.
Komisena blong VMSA, Less John Napuate hemi talem se Offis blong Pots and Haba, Pot Vila Municipal Kansel, Ofshore Depatmen mo SHEFA Provins oli no bin aware long pemit ia.
“Offis blong VMSA wetem ol nara depatmen oli neva apruvum pemit or awea long wok blong slipwei insaed long Pot Vila Haba,” hemi talem.
“Hemia emi wan pemit we Direkta blong Enviromen hemi mekem be hemi eno bin pas long mifala blong apruvum from nomo se yumi no alao blong bildim wan slipwei insaed long Haba blong yumi.
“Mifala rekomendem se pa eni futja slipwei blong sip pa mas bilt aotsaed long Port Vila Haba o aotsaed long Luganville taon, be pa no mas insaed, mo pa oli mas pas long mifala fastaem blong karem apruvol blong pemit.”
Komisena hemi sta askem tu long ol man Vanuatu blong no mekem tumas dispute long ol graon blong yumi fromse developmen hemi kam blong helpem yumi evriwan.
Tim lida blong karemaot Petisen, Champion Kalsakau hemi talem se emi impoten tumas blong Kavman i mas andastandem se yumi no mas spolim wota long Port Vila Haba from pa spolim enviromen blong yumi.
“Olsem wan natif blong Ifira aelan, yumi mas stopem ol kaen wok ia we save spolem wota blong yumi blong presevem blong futja,” hemi talem.
“I kat sam wokman blong slipwei long Malekula oli kam ripot se ol kemikel we oli usum blong reperem sip emi save spolem enviromen blong solwota.
“Ol kemikel blong klinim sip emi saveh posenem wota mo pa yumi nosave swim mo tu pa save kilim evri fis long solwota.”
I kat 1000 man mo woman we oli bin saenem petisen ia mo ol Jif mo Kansel blong Ifira oli bin pas yestedei blong pasem petisen ia long Pot Vila City Kaonsel blong i kasem ol big man long Kavman.
Petisen ia hemi kat 7 poin blong adresem nid blong ol pipol blong Ifira from oli liv long Pot Vila Haba.
1. Kavman i mas banem slipway blong operet long PV Haba
2. Komuniti representasen mas stap long ol decisen blong Kavman
3. Kavman mas promotem ol sastenable praktis
4. Kavman mas putum fine long ol man weh spolem wota blong PV Haba
5. Kavman mas givim insurens long ol pipol blong Ifira sos i kat impak blong wota polusen
6. Eni developmen mas kontribute long beautifikesen blong Port Vila taon
7. Kavman mas apruvum ol projek weh oli sef blong operet long PV Haba
Komisena Napuate hemi talem se Kavman emi sta plan blong wok wetem Kavman blong Korea blong bildim wan niu slipwei lo Vanuatu long futja.
VBTC hemi traem blong kasem Depatmen blong Energi beh oli no wantem givim wan komen long isu.
