Monday, July 15, 2024
25.5 C
Port-Vila
Monday, July 15, 2024
More

    VP mo UMP i registerem ol MP

    VP 7 MP, UMP 8 MP”

    Tufala bigfala politikol Pati, Vanuaku Pati mo Union blong Moderate Pati i registarem ol MP blong tufala finis long Palimen.

    Palimen i risifim ol infomesen blong tufala pati ia long Monday namba 24 June.

    Vanuaku Pati Presiden Bob Loughman hemi mekem rijistresen blong ol MP blong hem finis mo deklerem seh hemi gat wan total blong 7 MP.

    Mo Presiden blong Union blong Moderate Pati, Ishmael Kalsakau, hemi sendem leta igo long Spika blong Parliamen mo i soem seh UMP hemi gat 8 MP evriwan.

    Lis blong ol nem blong ol MP weh i stap insaed long leta blong Presiden blong UMP ia, hemi inkludum tu tufala MP blong hem weh tufala i holem yet ol Ministerial portfolio insaed long Gavman nomata weh Presiden blong tufala hemi stap long Opposition.

    Tufala Minista ia i gat Vaes Presiden blong Pati, MP Nako Natuman, mo Minista blong Edukesen, MP Anatole Hymak.

    Ol narafala 6 MP blong UMP i gat Presiden Ishmael Kalsakau, Anthony Harry, Gloria King, Sammuel Kalpoilep, Jean Baptiste Tama, mo Jesse Luo.

    Long saed blong Vanuaku Pati, leta blong President Bob Loughman i ko long spika, i diklerem nem blong hem, Johnny Koanapo, Wesley Rasu, Esmon Saimon, Simil Johnson, William Timakata mo Samsen Samson.

    Antap long 7 MP ia, VP i diklerem tu seh MP James Bule blong People’s Unity for Development Party hemi silim finis afiliesen blong hem mekem seh VP hemi komandem wan total blong 8 MP naoia.

    Fes pati weh hemi diklerem finis ol MP blong hem hemi Rural Development Party weh hemi stap long oposisen blok.

    Ol muvmuv blong ol MP mo ol politikol parti hemi folem wan leta blong Spika blong Parliament, Seoule Simeon weh hemi askem evri President blong ol politikol pati blong mas notifaem hem seh i gat hamas MP i stap long wanwan pati blong olgeta.

    Leta blong spika ia i stap talem tu long ol MP weh oli no memba blong wan pati yet blong oli mas diklerem afiliesen blong olgeta folem niufala article 17(B) long parliamen.

    Wok blong registarem olgeta memba bae hemi kam interesting long saed blong olgeta namba blong Gavman mo oposisen from igat sam memba blong oposition oli holem potfolio tu insaed long Gavman we Hon Charlot Salwai i lidim.

    Afta weh atikel 17A mo 17B hemi kam efektif long namba 12 June, ol pati mo MP oli gat 3 manis blong mekem ol wok ia bifo namba 12 August 2024.

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen