Aelan blong Efate bai hemi gohed blong experiencem o filim ol aftashok blong etkwek blong sam manis we i stap kam.
VMGD i talem se hemi nomal espeseli afta long wan bigfala etkwek, olsem hemi blong namba 17 Disemba 2024.
Hemi tri wik finis afta long bigfala disasta we 7.4 magnitude etkwek i mekem long Port Vila las manis.
Mo plante pipol i liv yet wetem fraet folem ol aftashok blong etkwek ya we i gohed blong muvum graon kasem tete.
Vanuatu Geo-Hazards Divisen i talem se emia bai hemi gohed blong sam moa manis we i stap kam.
Akting Maneja blong Geo-Hazards Divisen, Ricardo William i talem se divisen hemi rikodem ova 2000 aftashok sins 17 Disemba las yia.
“Wans taem yumi kat wan bigfala etkwek olsem long namba 17, hemi save disepem tu sam narafala vold weh oli stap olbaot long ol aelan blong yumi long Efate, mo risen wae yumi stil karem ol aftashok ia hemi from etkwek hemi bigwan mo i distebem ol vold mo ol vold ya hemi stap traem blong stapol bakeken mo oli stap kosem ol etkwek ia weh yumi stap filim olsem ol aftashok.”
Ol volt ya hemi ol krak inside long wan tektonic plate we wan aelan o continent i stap antap long hem.
Efate igat sam long ol volt ya.
Mo wan bigwan nao, 7.3 magnitude etkwek i kamaot long hem long W blong Efate.
VMGD i rikodem tu sam seisimic aktiviti long NE blong Santo Mo W blong Malekula long eli manis ya.
Hemia folem wan 5.3 magnitude etkwek long 5 Januari we i muvum plante long ol noten aelans.
“Tufala seisimic aktiviti ia oli stap hapen naya mo yumi long GeoHazard yumi stap kontinu blong monitoremm, mo hemya hemi nomol from yumi save yumi stap long Pacific Ring Of Fire, yumi kat wan sabdaksen zone ples weh Pacific mo Australian plate tufala i mit long wes saet blong yumi long Vanuatu.”
Mr. William i kam blong kliarem plante konsen tu se ol aftershock long Efate mo ol seisimic aktiviti long not inogat eni efek long ol volkenu long kantri.
“Mos long ol volcanoe blo yumi i stap long alert level 2, Ambrym , Lopevi, Gaua mo Tanna oli stap long level 2, mo Vanualava wetem Is Epi weh hemi ol sabmarin volcanoe oli stap long level 1.”
Vanuatu Geo-Hazards i talem se bai hemi gohed blong monitorem ol aftershock mo seisimic aktiviti we i stap gohed yet naoia.
