AFL Vanuatu i sendem finis tufala woman pleya mo wan kotj blong go representem Vanuatu long South Pacific AFL Women’s Camp long Australia. Hemi festaem taem we AFL Academy blong Vanuatu i selektem olgeta blong tekem pat long wan regional camp olsem, folem setting up blong akademi ia.
Kamp ia hemi wan annual event we hemi tekem tugeta olgeta pleya long ol Pacific kaontri we oli kat AFL akademi long kaontri blong olgeta. Hemi wan janis blong ol yang pleya ia blong tren mo divelopem skill blong olgeta long sport ia long wan narafala level.
Anda-16 woman pleya, Maseline Thompson mo Daniela Taitsekon, wetem kotj blong tufala, Jesta Toka oli lego Vanuatu finis mo bae oli tekem pat long fes trening blong olgeta long Gold Coast Metricon Stadium long namba 20 Februari. Ofisol AFL kem i stat long namba 21 kasem 23 Februari.
Semak akademi kamp blong ol AFL man pleya blong anda-16 bae hemi tekem ples tu long namba 20 kasem 23 March long Gold Coast, mo 3 player blong Vanuatu bae oli tekem pat long hem.
