Vanuatu i wantem strong toktok blong klaemet jens insaed long statement blong lida we oli stap long 52nd Pacific Islands Forum Lida Miting (PIFLM) long wik ia.
Minista blong Klaemet Jens, Hon. Ralph Regenvanu, hemi hed blong delekesen blong Vanuatu long PIFLM 2023 long Cook Islands.
Hemi i talem se emi wan opotunity blong raisem ol nasonal isiu blong Vanuatu.
Wan mein wan emi folem fosil fiul long Pacific we i kontribute long olgeta problem blong klaemet jens, we Vanuatu i stap fesem ol risk blong hem naoia.
Long end long forum, ol lida bae oli mekem wan faenal statement.
Hon. Regenvanu i talem se i nid blong gat strong language blong klaemet jens i kamoat long en miting ya, olsem bigfala isiu blong Pacifik.
Hemi folem Port Vila Call blong katem doan mo stopem fosil fiul long Pacifik we i kamoat long namba 5 regional minista miting blong eneji mo maritime long Port Vila long May yia ya.
“Yumi stap call upon, especially Australia, lo oli traem blo stoppem blo mekem eni niu production blo oil and gas and coal,” Hon. Regenvanu i talem.
Mo tu hemi talem se Australia i save givim ol sabsiti blong fosil fiul i kam long ol kaontri long Pasifik blong oli save usum i kam long renewable eneji blong bildim ekonomi blong wanwan Pasifik nason.
“Mani we Australia givim lo subsidisem produksen lo fosil fiul hemi trillions of dollars, hemi much much more than hemi givim lo yumi lo Pasifik blo helpem yumi blo effects blo klaemet jenj,” hemi talem.
“And evri mani we i stap go long fosil fiul naoia u talem oli givim lo Pasikif.
“Yu givim lo mifala, mifala save transformem eniji sekta blong mifala, i kam long renewable eniji, o mifala save transformem shipping sekta blong mifala, mifala stap ol yusum ol green shipping, yumi save yusum mani blong bildem moa resilient infrastructure, beta roads, beta publik bildings, beta skuls.”
Lida blong fulap Pasifik kantri oli stap long miting long wik ia, be Praem Minista blong Papua New Guinea mo Praem Minista blong Solomon Islands oli no stap. Praem Minista blong Australia, Anthony Albanese, hemi stap long lida miting.
Hon. Regenvanu i talem se i gat fulap tingting mo programs blo Pasifik rijin we ol Pasifik lida bae oli tokabaot long lida miting ia.
Hemia includem fulap tingting long saet klaemet jenj, fisheries mo labour mobility mo sam narafala samting.
Mo tu, Hon. Regenvanu hemi bin chair long Melanesian Spearhead Group caucus miting long Cook Islands. Long miting ia, caucus oli appointem Praem Minista blong Fiji, Sitiveni Rabuka, mo Praem Minista blong Papua New Guinea, James Marape oli olsem tufala special envoy long West Papua.
Hon. Regenvanu i talem se tufala bae oli go toktok lo President blo Indonesia lo traem findem wan resolution long isu ia, especially lo saet long human raets.
