Vanuatu Gideons tim we oli stap ripresentem kaontry long Oceania Football Confederation (OFC) Futsal kwalifae raon long Niu Ziland, oli nidim wan mo win nomo blong sikiurum spot blong ko insait long semi fainal.
Hed kotj blong Vanuatu Gideons tim, Benny Hungai, hemi konfem se, wetem win blong Vanuatu long yestete akensem Tonga, hemi kivim hop mo asurens se nekis kem blong tim oli nidim wan mo win nomo.
“Mi wantem talem bikfala tankiu i ko long Papa God from fiktri ova long Tonga, Gideons hemi neva kif ap, wetem gudfala tim spirit we oli muv wetem,” Mr Hungai i talem.
Mr Hungai hemi poentemaut se nomata long olgeta jalens we tim hemi ko tru long hem, tim hemi no luk taon, be hemi fait blong kasem en blong tunamen ia.
Hemi fes win blong tim long tu kem insait long pool stage blong OFC Futsal kwalifae raon hemia long Niu Ziland.
Vanuatu hemi pleyem fes kem blong olgeta long wiken akensem defending jampion, Niu Ziland, mo i lukim oli kam blong autem olgeta long wan sko blong 6-3.
Wetem letes ripot we VBTC Sports hemi kasem long Gideons media ofisa long Niu Ziland, oli talem se eim blong tim long fes kem hemi blong ikwelais, be from nomo plan hemi no save wokauit olsem we i stap, i mekem jampion, Niu Ziland hemi winim olgeta.
Wetem fes lus blong Gideons long tunamen, ol boe oli kam blong luk ol wiknes mo wok long hem kasem long seken kem taem oli smasem Tonga long 22-2.
Jason Timatua hemi karem awod blong top pleya long matj ia.
Wetem olgeta risal ia, Mr Hungai hemi talem se kol aferedj blong tete hemi asiurum tema se sapos Niu Ziland hemi winim Fiji long tete sava, i minim se las pool kem wetem Fiji, Gideons hemi nidim wan dro nomo blong kwalifae i ko long semi fainal.
Het kotj hemi aknoledjem tim manejmen mo ol pleya tru long had wok blong olgeta mo bilif blong olgeta blong luk fowod long nekis kem mo tekem kem ia siries.
Nekis kem blong tim, long tumoro Wednisdey akensem wan moa pawa haus, Fiji.
Wina blong tunamen ia ia bae hemi ko ripresentem Osenia long FIFA Futsal Wol Kap long Uzbekistan long nekis yia 2024, namba 14 Septemba kasem long namba 6 Oktoba.
