Tu pipol i lusum laef long wan rod aksiden long wiken hemia long Natanara, East Santo.
Polis long Santo i konfemem long VBTC Nius mo talem se kos blong aksiden hemi alcohol.
Polis i talem se rod aksiden ia i hapen long Friday raon long 10pm.
Polis long Santo i talem se draeva blong car wetem tri passenja oli stap anda long influence blong alcohol taem trak i bangem wan nara trak we i stop long saet blong rod i stap.
Polis i konfemem se tufala pasenja i lusum life mo nara wan i stap long hospital naoia stap long serious kondisen.
Polis i talem se draeva i stap naoia long hand blong polis mo investigation i stap go hed.
Polis i ko hed blong talem se ol draeva oli no mas drink alcohol mo draevem trak long pablik rod from hemi tekem aot laef.
