Anolyn Lulu hemi wan long ol impoten woman blong spots long tebol tenis we hemi sta ple kolosap 28 yia nao mo hemi winim 24 medel tru long plante Pasifik, Osenia mo intenesenol gem.

Anolyn we emi kat 44 yia, emi talem se hemi stat ple gem ya taem e stap kul long Saint Patrick’s skul long Ambae.

“Me statem ple osm wan pikinini beh me neva tinkse pa wan dei pa gem ya e tekem me kasem Olimpik Gems,” hemi talem.

Long yia 1995, Anolyn i bin mekem decisen blong finisim skul long yia 10 long hem mo ronem drim blem blong kam wan gudfala tebol tenis atlet.

Hemi tren blong 10 yia bifo e joinem fes spots kompetisen blem long Guam.

Long yia 1999, taem Anolyn hemi kat 20 yia nmo hemi bin kolo fes Saot Pasifik Gem blem long Guam. Long taem ya tim blong ol woman long Tebol Tenis blong Vanuatu emi winim fesfala medal blong brons long maj blong dabols.

Hemi talem se emi fes taem we Vanuatu e winim wan brons long dabols sins long yia 1991 we oli wan nara tim blo ol woman long Vanuatu oli winim brons long singels.

Afta long smol win ya, Vanuatu tim blong tebel tenis blong ol woman oli winim wan medel evri taem long hamas yia ia kasem tete.

“Sins long yia 1999, mifala patisipet long 7 Pasifik Gems mo mifala mas winim medal oltaem, sapos emi wan brons, silva, o gol, emi wan bigfala win finis blong Vanuatu.”

Spots karea blem e kik of

Long yia 2004, taem Anolyn e kat 25 yia, hemi bin atentem fes rejinol gem we hemi Osenia Jampionsip long Niu Zealand.

Mo long yia 2006, hemi bin atendem fes Komon Welt Gems long Australia olsem man we holem flag long taem we seremoni emi stat.

Long bigfala Olimpik Gems lo yia 2008, Anolyn i bin kam osem wan maneja blong tebol tenis tim mo hemi lukaotem gud ol pleya long taem ya, wan long olgeta we e bin ple lo kompetisen ia emi Priscilla Tommy we hemi wan famos pleya naoia we e bin ple tu long Pasifik Gems long Solomon Aelans long yia ia mo winim gol medol.

Anolyn e talem se emi hapi tumas blong luk sista blem Prescilla emi sta tren had tumas blo kam wan gudfala tebol tenis pleya.

“Hemi wan pleya we kat gudfala skil long gem ya mo pa hemi lanem gem kwik sins hemi smol kasem naoia lo spots karea blem.”

Long yia 2012 long taem blong Olimpik Gems long England, Anolyn i bin kwalify olsem wan top merit pleya mo hemi fes woman long Vanuatu blong karem kwalifikesen ia.

“Olimpik Gems hemi wan long ol bigfala spots gem we nidim ol gudfala pleya we oli kwalify nomo blo oli ko ple blong representem kantri blong olgeta.  

“Mi bin glad se me ko blong representem Vanuatu olsem wan atlet mo olsem wan man we holem flag long taem we seremoni stat.”

Long yia 2019 i bin wan bigfala momen blong women’s tebol tenis tim we oli mekem histori blong kwalify blong ple long Tebol Tenis Wol Kap.

Pasifik Gem long Solomons

Mo tu long yia ya long Pasifik Gem long Solomon Islands, tufala top pleya long tim Anolyn mo Priscilla oli bin manej blong winim 2 gold long final maj wetem Tahiti long dobols (3-0) mo singols (4-0) ivent.

“I no gat taim blong sidaon mo yu spel from tebol tenis emi wan spots we i nidim yu blong konsentret strong mo no mas tingting aotsaed long gem.”

Tim blong woman oli winim 2 brons medol long ol dobols mo women’s tim ivent, i mekem se tebol tenis tim hemi winim 4 medol long Solomons Pasifik Gem.

“Tim ivent emi impotent bigwan fromse long hamas yia we e kam, mefala win oltaem mo neva lusum wan medol.”

Anolyn e talem tu se win blong olgeta emi wan bigfala prokres from nomo se oli no ple tumas long kompetisen long reginol beh oli still manej blong winim bak titol.

Spots save tekem yu raon lo wol

Anolyn i glad tumas se tru long spots karea blem hemi bin travel raon long wol mo hemi mitim fulap famos man olsem Serena Williams, Kobe Bryant, Usain Bolt, Ronaldinho mo fulap moa.

“Spots kat pawa blong tekem yu raon long wol mo emi kivim yu opotuniti long lukluk ples mo mitim fulap man long diferen kantri.”

Blong kam wan gud atlet, Anolyn e se hem emi tren evri taim afta long wok kasem tudak mo e kaekae ol gud helti kaikai evri taim.

“Mi nosta kolo jim from Zumba hemi hao me tren mo kipim body blo me i strong mo emi fitness, fitness trening blong mi.

“Sos yu wantem kam wan gudfala spots pleya yu mas laekem wanem we yu sta mekem mo yu tren had.”

Anolyn emi talem se wok blong hem long spots emi mekem fulap yangfala oli wantem ple tebol tenis tu.

“Me mas wokem toktok long ol tim memba blong me blo remindem olgeta from wanem nao emi impoten blo ple gem ya mo hao pa oli save kam ol gudfala ambasada long ol intanasenol mo reginol gem.”

Hemi talem se sapos wan dei hemi finisim spots karea blem mo e spel pa emi hapi tumas from e travel raon long wol vinis mo hemi ple fulap kompetisen long spots mo follem gud drim blem.