Vila Central Hospital (VCH) bae i stat blong sendem aot ol sik man we sik blong olgeta i no nid blong pas long Emejensi blo kolo klinic nomo.
VCH hemi stap givim helt seves long ova 100 sik man long wan dei.
Wan long olgeta konsen we hemi kam aot long ol otoriti konsen, hemi ples blong outpatient seves istap fulap tumas long ol man.
Long 2021, VCH Outpasen Depatmen i resem konsen long pablik, se VCH emejensi hemi eria blong ol sik man we sik blong olgeta hemi mo bigwan mo nogud tumas be olgeta we oli kat ol smol sik nomo oli mas ko stret long klinic.
Be kasem naoia pablik oli wokem stap pas long VCH Emejensi.
Acting Hed blong VCH Emejensi Depatmen, Dr Roderick Mera i talem se ol pablik oli gat tu wei blong folem naoia.
“Fes wan hemi bae mifala traem tanem raon yu, yu go bak long ol klinik blo yu,” Dr Mera i talem.
“Yumi kat Vanuatu Family Helt daon long taon ia, yumi gat Nambaru, yumi gat Nambatri lo wei, yumi got Ollen, yumi gat Wan Smol Bag mo yumi kat NTM.
“Bae yumi traem tanem raon yufala from se yufala sidaon, bae yufala wet. Sipos we yu no wantem go bak lo klinik ia, sori tumas be bae yu wait mo yu save wait kasem 2 to 3 hours.
“Normal blo yumi we traem lo luk evri man bifo 4 hours, be sapos we yu sidaon longtaem bitim, hemi simply minim nomo se sik blo yu hemi no siries enuf blong mifala kam luk yu kwik taem.”
Pablik tu hemi kat konsen se blong olgeta we wok oli mas kam pas long VCH blong karem sik liv from nomo se wok ples hemi no nidim sik liv blong klinik.
“Mi enkarijim ol kampani plis yu respektem ol sik liv ia mo yu akseptem from se mifala tu lo ples ia mifala no wantem writem ol sik liv, ol medikol setifiket ol ovasea travel, ol skul sertifikate, o samting olsem ia from hem hemia no wan emejensi and mifala no ting se hemi gud blo mifala yusum ol pawa o energi blo mifala blo luk lo samting olsem we hemi no sik man,” Dr Mera i talem.
Wan long olgeta jalenj long emejensi depamen hemi oli nokat inaf wokman blong givim seves ariap long ol sik man.
“Mi enkarijim pablik blo direktem ol pikinini blo yumi blo go insaed lo helt blo oli go lo skul blo helt oli kambak oli helpem growem namba blo mifala we oli stap blong mekem se mifala save leftemap kwaliti blong sekta blo helt ia blong kasem wan standed we yumi evriwan bae hapi lem,” hemi i talem.
Long Facebook pej blong Health Promotions Vanuatu, oli gat wan list we oli talem blong yu save jekem sos yu wantem kolo VCH Emejensi.
Yu save ko long VCH Emejensi nomo sipos yu:
– Aksiden
– Jes i so o hevi
– Hat i bit hariap
– Blad i ran tumas
– Kof o traot blad
– Sot win
– Ae i dak o blak aot
– Foldaon mo lusum konsious
– Hed i raon
– Bel i so tumas
– Traot tumas no save kaikai o dring
– Hed i so tumas
– Lek i wik o namb
– Hae fiva
Be yu no save ko long VCH Emejensi be yu sud ko long wan klinik kolosap long yu sipos yu wantem mekem:
– Sik liv
– Ded setefiket
– Pepa blong travel
– Pepa blong meresin
– Jek ap form kol o flu
– Dresem so
– Jenisem bak blo pispis o cauju
– Stik meresin blong sik blong hat
– Ripot blong polis
– Mekem rebooking
