Famili seperesen hemi continue blong inkris mo plante i putum blem long seasonal wok program.

Vanuatu Women Senta hemi talem se isu ya hemi ko tumas mo i askem kavman blong mas act kwik taem

Tete pipol hemi usum social media plante blong tok akensem ol rapis fasin we i kamout long seasonal worka program, espesli olgeta isu wei kamap taem ol Ni-Vanuatu i stap long program ia ova seas.

Vanuatu Women Senta long port vila, i ripotem se ikat hae namba blong ol woman, we oli stap ko long kaonseling or ripotem ol kes, we hemi dil wetem ol patna blong olgeta we oli stap wok long seasonal wok program.

Kodineta blong Vanuatu Women Senta , Tatavola Matas, i talem se fastaem ikat ol woman age krup blong 30 mo ova nomo, oli stap visitim ofis ,be naoia ol yangfala gel long age krup blo 18-21, oli stap kam ripotem ol patna blong olgeta tu, mo ofis hemi raisem ap se isu ya hemi stap kam out of control.

Mrs Matas i talem se “ol Vanuatu Women Sentre hemi save mekem at this stage hemi storian wetem client, harem story blong hem, empawarem hem tru long kaonseling.”

Mrs Matas i talem tu se isu blong seasonal wok hemi afectem tumas ol pipol blong Vanuatu mo kavman i mas toktok.

“Economicali hemi benefitim yumi, hemi karem ol remitences i kam bak , be social aspect blong hem i stap ko aot long kontrol, so me tingse ol pipol we oli holem moa pawa olsem kavman, developmen patna blong yumi, blong yumi luk luk moa long hem.”

Long manis ia nomo ol ponographic video hemi kamout long social media, we i showem ol Ni-Vanuatu workers we oli werem uniform.

Long taem we Foren Afea Minista blong Australia, Penny Wong i visitim Vanuatu long Apri 2021, Presiden blong Malvatumauri, Jif Willie Grey Plasua i talem long hem se Season Work program Framewok hemi sud includim olgeta kastom Jif.

Hope blong Jif, Plasua hemi blong bae isave redusim ol isiu olsem extra-marital afea we istap hapen.

VBTC News hemi traem yet blong kasem komen blong depatmen blong Leba long ol ol konsen ia.