Referendum hemi taem evri pipol blong kantri i mas vote “Yes” o “No” long wan law we hemi dil wetem wan spesifik isu mo bae majoriti vote hemi save jenjem Constitution.
Head blong State, His Excellensi Nikenike Vurobaravu hemi bin saenem wan bill blong Constitution (Eighth) (Amendment) Act las yia blong sapotem Political Parties Registration Act.
Political Registration Act hemi blong palamen hemi mekem wan legislation o law we hemi nidim evri memba blong palamen blong regista anda long wan politikol pati.
I kat tu stamba tingting behaen long Political Parties Registration Act, fes wan hemi bae; palamen i tekem aot jea blong wan memba blong palaman sapos oli resaen long politikol pati blong olgeta o sapos oli aotem olgeta from oli no kivim eni sapot long politikol pati blong olgeta.
Nara tingting hemi; sapos oli no regista long eni politikol pati bae oli lusum jea blong olgeta long palamen.
Tufala men tingting ia bae save kam olsem wan niu ammendmen long Mama law afta we referendum hemi tek ples long kantri mo taem oli kountem ol majoriti votes blong agri o disagri lem.
Jeaman blong Elektrol Ofis, Edward Kaltamat hemi talem se stamba tingting behaen long referendum ia hemi folem muvmuv we ol minista blong palamen oli stap mekem blong krosem flo blong palamen.
“Yu save fom freely be taem yu kolo palamen yu nomo save muvmuv olbaot, yu mas stick wetem politikol pati we yu contest long hem we ol pipol oli trastem parti ia mo oli votem,” hemi talem.
Mr Kaltamat hemi tok moa se olgeta fri blong fomem o joenem wan politikol pati be bae i kat sam restriksen o sam rul blong folem tu.
“Yumi putum inserts blong 17A mo 17B (Constitution Act) we i tokbaot se yu save muvmuv freely be sapos yu jenjem affiliation blong yu afta long election yu save lusum seat blong yu.”
Elektrol Kommission hemi anounsem finis deit blong nasenol referendum we bae hemi stap long Wednisdei 29 long manis blong Mei 2024.
