Kolosap 5000 man mo woman oli saenem wan petisen blong politikol refom i mas kamaot nekis yia long Palamen blong stopem kavman instabiliti long Vanuatu.

Muvmen blong Red hemi voes blong ol pipol we oli sta kol long Kavman blong mek sua se evri bill we oli putum insaed long petisen mo additional bill long amended petition i mas pas tru long Kavman bifo manis blong Maj nekis yia 2024.

Hemi stat Fromse i kat tumas jenis mo ol raorao insaed long kavman blong numba 13 legisleta, i stap showem long ol pipol se kavman ia i kat tumas politikol instabiliti.

Muvmen ia i talem se politikol instabiliti ia i mekem se Kavman hemi nosave sapotem ol nid blong ol pipol long saed blo impruvum ol rod, ol hae praes blong kaikai long stoa mo maket, ol yut weh stap lukoatem wok naoia, ol sik pipol, ol hospitol we nidim ol niu nes mo rekaveri blong saeklon long ol aelan blong yumi we ol komuniti oli kat bigfala nid blong kaikai, wota mo biltim bak ol haos blong olgeta.

Memba blong Red Muvmen Komiti, Relvie Poilapa i talem se ol bigman blong Palamen we yumi vot from we oli representem ol difren konstituensi raon long Vanuatu, oli holem pawa mo otoriti we oli gat folem tingting blong olketa nomo.

“Maet oli bin spendem bigfala mani blo stanap long taem blong wan eleksen olsem wan kandidet, be hemi wan wan vot blong yumi evriwan, ol man, woman mo ol yut tugeta we hemi givim pawa mo namba blong wan kandidet i save ko insaed,” hemi talem.

“Ples ia nao plante man oli stap foketem, se olsem wan vota, yu gat raet blong yu toktok long man we yu vot from, mo blong resem ol konsen sapos yu luk se kandidet blong yu hemi stap mekem ol disisen we i no klia gud, mo tu hemi no stap lo intres blo leftemap laef blong ol sitisen.

“Plante taem ol man oli se yu no mas aprojem ol lida blong yumi daerek from se yumi mas gat fasin blong rispek. Beh rispek hemi ko tu wei. Taem we yu givim rispek, bae yu iet yu risivim rispek ikam bak.

“From wanem ol lida blong yumi oli no save soem aut long ol pipol se olketa tu oli rispektem yumi? Taem we yumi luk se oli lida blong yumi oli mekem ol disisen we emi no lo bes intres blo komuniti mo naesen, i gat plante negatif impak we stampa wan emi yumi lusum trast long lidasip blong olketa.

“Be from we yu iet yu bin kivim pawa ia lo fes ples, i minim se yu iet bagagen yu gat pawa blong yu jenjem.”

Kol blong wan politikol refom blong nekis yia emi blong pasem ol bill tru long petisen ia, mo bae i kat wan nid blong wan refarendum we bae nidim 2/3 blong memba blong palemen blong passem.

Ol 8 bill ya emi; Politikol Pati Registresen bil, Elekrol Act bil, Amendmen long disentrolaesesen Act, Amendmen long Municipality Act, Referendum Act Bil, Amendmen long Right to Infomesen Act, Amendmen long Jaritabol Asosiesen Act mo Bil blong Konstitusen Amendmen Act.

Wan long ol impoten bill ia we bai pas long Palamen hemi blong stopem Palamen blong pasem wan mosen blong no konfidens agens wan Praem Minista afta long 12 manis we hemi kam insaed long ofis.

Petisen i bin kasem offis blong Spika blong Palamen long sem wik ya nomo mo i kat plante man we oli stap saenem petisen yet long ol aelan blong sowem sapot.

Hed blong Red Muvmen Komiti, Mike Esrom Kaun hemi talem se sins yumi kasem indipendens fulap samting i bin happen weh i afektem wei blong divelopmen mekem se yumi lukim risal ino kamaot gud long ol man ples.

“Yumi luksave se voes blong ol pipol nao i nomo kamaot gud. Muvmen ya i stap kivhan nomo blo pulum bak tingting blong yumi evriwan i kam long most impoten samting. Ino wan sistem, or wan pati, ino mani mo ino pawa emi pipol blong Vanuatu,” hemi talem

Muvmen blong Red emi wan grup weh e kirap long yia ia from nomo se e kat tumas politikol jenjes long Kavman blong tede mo ol pipol oli bin mekem wan pisful maj long manis blong Novemba blong pasem petisen ia long Palamen.

Grup ia emi gohed blong pusum plante pipol long Vanuatu blong saenem petisen blong mekem Kavman e save harem voes blong yumi.