Ova 6000 passport i stap yet blong printim folem software sistem we wok slo naoia.
Regulation Ofisa long Immigration Ofis, Stephen Willie i talemaot long Labour Tokbak Sho long wik ia se hemia hemi ol passport aplikesen blong Port Vila, Tafea, Santo mo Noumea long New Caledonia we hemi 6225.
“Naoia yumi stap printim aot ol aplikesen blong May; June nomo hemi araon 686, long Julae blong Port Vila nomo hemi 1387, blong Septemba yumi gat 1135 mo long Octoba kasem long deit blong yestete (Wednesdei) hemi araon 633,” Mr Willie i talem.
“Long Vila nomo yumi gat 5229 aplikesen we bae yumi talem se ol bak log we yumi nid blong sotem aot, taem yumi adem ap ol aplikesen blong Tafea, Santo mo Noumea yumi en ap wetem 6225 aplikesen i stil stap blong yumi prosesem olgeta.
“Long saed blong kavman mi mas apologize (talem sori) from sam dilei we i stap hapen from databeis blong yumi nomo i slo; sistem we yumi stap yusum hemi develop olsem Microsoft akses mo hemi hard blong yumi apgredem.”
Mr Willie i talem se nara jalenj hemi politikol instability we i stap i hard blong yumi mekem ol disisen.
“Bae mi no fraet blong talem be mi mas honest,” Mr Willie i talem.
Hemi talem se tender proses blong wan niu software i tekem ples vinis.
Mr Willie i talem thank yu long ol patna we hemi Australia mo New Zealand blong yusum Certificate blong Identity blong ol aplikesen i print.
