Folem instabiliti weh Vanuatu emi kat tedei i soem pipol oli stap tugeta long Independence Park blong tekem pat long wan pisful pared i ko long Saralana Park .

Emi blong talem long ol honorobol lida seh i naf long Instabiliti mbe emi taem blong oli wok tugeta long intres blong nesen.

Grup blong ol pipol we i mit tedei long morning long Indenpendance Park long Port Vila oli soem konsen blong olgeta long politikol situation blong kauntri.

Wokabaot blong olketa tede emi blong talem long ol 52 memba blong palemen se emi taem nao blong jenisim ol tingting blong olketa mo kam long wan ajenda nomo emi blong sevem pipol blong Vanuatu fatsaem.

VBTC emi i witnisim sam long ol bana we pablik i olem wetem olketa tedei emi kam long wan tingting nomo emi blong stoppem Instabilti or ol kruket fasin long nasonal Palimen.

VBTC i toktok wetem wan strong olfala weh emi bin faet from fridom blong niu hebredis bifo mo i kam Vanuatu tede, Pakoa Isikiel Charlei mo emi askem ol lida blong respektem ol votas blong olketa.

“Tedei hemi 43 yia finis, beh yumi no faenem wan solusen yet blong ansarem ol nid blong ol pipol.

“Wan exampol, taem yu kam lo naoia weh yumi stap luk long eye blong yumi, long fulap aelan, ol rod we i stap i no kasem ol ples we i shud kasem, ol hospitol tu, ol man i nid blong kat wan hospitol beh olgeta i stap wokem muvmuv lo palemen, afta ol man weh oli stap, wanem bae happen long ol?.

“Aim blong yumi tedei ya, hemi sapos weh yumi stap 43 yia, yumi mas kam long mature age, mo yumi mas no mekem wok blong pikinini.” Mr Charlei i talem.

Emi askem tu sipos ol lida oli saveh jensem sam toktok insaet long konstitusen from yumi 43 yia mbe sam long ol mama loa ia ino wok nomo.

“Hemi no bin nidim yumi, beh yumi stap lusum mani long nating nomo, wanem nao use?

“Seh i mo gud blong putum ol Jif i ko insaed, beh questen blong mi i ko long ol jif tu, taem oli mekem constitusen, oli no kivim wan pawa i ko long ol jif tu seh bae oli saveh ko insaed, mi olsem tedei ya, sapos weholi dabolem bill, oli mas jenjem konstitusen , oli mas mekem review long konstitusen, blong kivim raet blong yumi blong save mekem sam mo loa blong benefitim kantri.”

Wetem pisful pared weh emi tekem ples tede, ol votas oli wantem luk wan jens weh emi kivim hope iko long olketa long fiuja.