Vanuatu Polis Fos (VPF) hemi lonjem Operesen Noel long wik ia blong operet wetem sapot blong ova 200 ofisa weh bae oli wok had blong kipim ol komuniti oli sef long krismas holidei.
Operesen Noel pa hemi wok mo patrol raon long Port Vila taon, long ol komuniti mo tu long ol provins blong stopem eni kriminal aktiviti stat long Desemba numba 23 kasem Januari numba 2.
Asisten Komisena blong Saoten Koman, Alan Rowbani hemi talem se bae kat 201 ofisa long VPF mo wan platoon blong VMF mo olgeta long Maritme Sekuriti weh oli stanby nomo blong sapot long Operesen Noel.
Polis Komisena Robson Iavro hemi askem ol komanda blong evri provins blo wok gud wetem ol ofisa weh bae oli wok long Operesen Noel mo guidem gud olgeta evri taim.
“Evri komanda oli nid blo mekem sua se yufala mas monita gud mo coachem ol ofisa blong oli pefom gud long taim oli out kolo ol strit, long Torres kasm Aneityum.” Hemi talem
“Yumi wantem luk se long yia ia bae nogat tumas polis brutaliti lo operesen blong Noel. Bae olgeta ofisa oli mas dil wetem ol visita mo ol pipol blong komuniti wetem rispek mo wetem profesenolism.”
Hemi talem se bae kat bigfala risk blong ol stil mo brek in long ol aos, bae kat ol drong man oli faet long rod, ol drong draeva pa oli aksiden mo pa kat ol events tu weh pa nidim blong Vanuatu Polis Fos oli lukoatem.
“Yumi mas rere nomo blong helpem ol pipol, sos i kat wan bigfala ren, yumi nidim VMF blong mek sua se ol medikol senta blong yumi oli lukoatem gud.
“Yumi mas tingting gud nomo se pa kat sam ples weh bae oli nidim sapot blong Polis mo yumi mas stanap mo redy nomo.”
Komisena Iavro hemi talem tankiu long olgeta Komandas long evri provins long gudfala hadwok mo ol jalenjes long yia ia.
“Yumi luk fulap aktifiti blong Kraem Prevensen Unit weh Vanuatu Polis Fos hemi okanisem olsem Strit Soka gem mo Bisikel kompetisen weh i kat ol gudfala awenes weh helpem ol yuts blong yumi blong kam ol gudfala sitisen blong kantri,” hemi talem
“E kat plante wok emi stap yet blong finisim beh bae umi mas save se ol plan save jenis folem neja blong wok beh yumi no mas giv up.”
Komisena Iavro hemi talem tankiu long ol patna blong Australia mo Niu Zealan weh oli sapot bigwan long Polis trenin mo defens saed.
