I kat 72 polling stesen long Sanma provins mo Vota Registrasen tim i registarem ol man finis blong save vote usum Nasonal ID kat blong olgeta.
Olgeta polling stesen i kat Malo/Aore Constituency we i pat tu insaed mo bambae ol pipol i save usum blong vot long hem long Sanma Provincial Eleksen dei.
Registrasen tim i bin pas long 6 fala eria kaonsel long las wik mo infomesen we VBTC nius i kasem se long sam polling stesen fulap pipol i no bin kam blong regista.
Electrol ofisa long Sanma provins, Henry David hemi talem se, Vanuatu Elektorol Ofis (VEO) mo Civil Registrasen mo Identiti Manejmen (CRIM) i bin karem seves ia i ko long doa step blong ol pipol ia finis, bifo registrasen hemi klos.
“Polling dei hemi wan dei nomo we yu muv i kam blong kastem vot blong yu, be vota registrasen hemi wan wik,” hemi talem.
“So wetem time, mi tinkse taem pipol oli harem infomesen, 1-week hemi sut inaf blong pipol oli muv in blo aksesem ol registrasen point long ol communiti we ol fil woka I stap long hem.”
Hemi talem moa se ol pipol save kam mekem long Sanma Provincial Hed Kota blong dupliket kat mo new ID kat.
“Dupliket hemi still open yet, so sapos we anywan i mestem tim we i pas roan blo mekem wan Nasonal ID kad, opotuniti i stap long Provincial Hed Kota.”
Deit blong dupliket ol kad bae klos long namba 1 Maj yet.
I kat ova long 80 candideit we oli aplae blong stanap long Sanma Provincial Eleksen.
I stap naoia long Elektoral Komisen blong mekem screening mo putum aot final saksesful candideit we bambae oli save contest.
Registrasen blong ol vota hemi klos finis long namba 2 blong manis ia.
