Sunday, May 19, 2024
29.8 C
Port-Vila
Sunday, May 19, 2024
More

    Ol volentia long Vanuatu oli selebratem Intansenol Volentia Dei

    Ol woka blong volentia program blong Niu Zealand. Foto: VBTC

    Ol volentia agensi long Vanuatu oli bin selebratem Intansenol Volentia Dei long yestete.

    E kat plante man mo woman long diferen kantri olsem France, Niu Zelan, Australia mo Japan weh oli kam olsem ol volentia blo mekem fulap gudfala projek long diferen sekta blo kantri.

    Ol volentia long difreren prokram oli bin kam tugeta long Feiawia Pak long Desemba numba 5 blong Intansenol Volentia Dei mo givim sam demonstresen long saed blo wok mo kalja blong olgeta.

    Wan offisa blong Japan Intanasenol Coperesen Agensi (JICA), Rebecca Lunabek hemi talem se Vanuatu emi nidim help long ol nara kantri long saed blong volentia wok blong helpm bildim komuniti.

    Ms Lunabek hemi talem se JICA emi sentem ol volentia i kam folem rikwes blong Kavman blong helpem fulap depatmen mo long praevet sekta tu long saed blong sherem sapot, skil mo niu tingting weh oli karem kam long diferen kantri blong olgeta.

    “Ol volentia weh oli joinim yumi oli no kam blong replesem ol wokman beh oli kam blong sapotem wanem weh e stap finis,” hemi talem.

    Itomi Ryosuke hemi wan volentia long JICA weh hemi kam wok olsem wan Tim Managa blong Atletiks long Vanuatu blong tek pat long Pasifik Gems long Solomon Aelans lo yia ia.

    I kat 8 volentia long JICA we oli kam wok long kantri mo Mr Ryosuke emi wan long olgeta we pa wok 2 yia nomo blong helpem spots sekta.

    “Mefala kam wok long volentia prokram wetem 3 stamba tingting; fes wan emi blong helpem laef blong ol pipol, nekis wan hemi blong lanem diferen kalja mo las wan hemi blong karem experiens kobak long Japan blong mekem wan jenj long kantri.”

    Volentia blong Australia long ProMedical i givim wan demonstresen long saed blong CPR. Foto: VBTC

    Unated Stet blong Amerika emi bin stopim prokram blong Pis Cops volentia long taim blong COVID mo pa hemi stat bakeken nekis yia.

    Brett Rakau hemi wan Komunikesen Speselis long Pis Cops mo hemi tokbaot hao sevis blong prokram emi save impruvum laef blong ol komuniti long saed blong bildim ol projek weh pa stap longtaim.

    Hemi talem se sevis blong volentia prokram hemi fri mo Pis Cops hemi wok long tu impoten sekta nomo we hemi blong helt mo edukasen long 16 aelan blo Vanuatu.

    “Mifala gat planete projek we volentia oli engage wetem hem lo islands and lo saed blo sustainability mifala mek sua volentia hemi gat wan countapat, countapat hemi mein samting we volentia hemi mas wok wetem hemi in orda blo continuem wanem wok we volentia hemi lego i stap, bae countapat hemi help karyem on ol wok oli go fowad,” hemi talem.

    Mr Rakau talem se sapos oli setemap wan sola projek, olsem wan sola wota pump o samting, i nidim wan man blong i stap long vilij blong helpem lukoatem gud projek afta volentia i lego.

    Wan volentia blong Australia, Beatrice Spring hemi wok long Vanuatu Sosiati blong ol Pipol wetem Disabiliti blong 1 yia nao mo i hapi tumas blong wok wetem ol pipol wetem disabiliti long hao blong impruvum laef blong olgeta.

    “Mi stap givhan mo wantem serem ol save mo skil blong me blong helpem ol pipol wetem disabiliti blong oli save strong mo independen long ol komuniti blong olgeta,” hemi talem.

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen