Vanuatu Surfing Asosiasen mo grup blong Solwota Sista oli bin mekem wan prokram blong growem bak ol koral long solwota long Pango mo Pele wetem ol pikinini blong komuniti.
Tim blong Vanuatu Surfing Asosiasen, Dorothy Jerry hemi talem se stamba tingting blong prokram hemi blong lanem ol gel mo boy blong saveh hao blong planem mo growem bak koral rif long solwota sos emi ded.
“Sos ino kat rif bae nogat ples blong ski long solwota, sos eni ples weh yu ko yu notisim seh i kat waves bae yu saveh i kat rif mo tu yumi notisim seh umi sta lusum fulap rif blong yumi long solwota,” hemi talem.
“Taem yumi planem bak hemi pat blong food sekuriti blong yumi, yumi putum mo growem bak ples blong ol fis long solwota mo tu yumi olsem ol man blong ski long solwota yumi kat wan ples blong ski lem mo yumi karem evriman tugeta blong showem seh yumi klaemet resilien.”
Dorothy hemi toktok moa se klaemet jenj sta afektem solwota blong yumi mo yumi mas planem bak ol niu koral from solwota hemi wan impoten sos blong kaikai mo emi sustainem daily laef long komuniti.
Hemi tok moa seh i kat tu diferen kaen wei blong planem bak koral rif.
“Fes wei mifala usum wan mesh wire mo bilidim kam olsem wan box frem mo yumi karem ol koral mo usum ol strong wire blong fasem e kolo frem ia.
“Nara wei hemi mifala karem ol koral rif mo putum long ol smol cement blok weh mifala signaotem seh kukis (cookies) weh yumi fasem long wire kolo ol mesh wire.”
Vanuatu Surfing Asosiasen tim hemi planem tri koral rif neseri long komuniti blong Pango mo Pele mo oli mas monitorem gud kasem emi gro gud.
Senior tim memba blong asosiasen, Zaridah Taleo hemi se oli hapi blong karem sapot long eni okanisasen we i wantem helpem prokram ia mo sipos kavman hemi wantem step in blong sapot hemi oraet nomo beh oli no wantem depend tumas long kavman.
“Sos kavman no wantem helpem mifala long wok blong mifala, bae mifala finem wan wei blong helpem enviromen blong mifala from se hemi responsibiliti blong evri man mo hemi solwota blong yumi,” hemi talem.
Tim oli aware se ol kavman depatmen oli stap mekem semak prokram long saed blong marine conservation beh oli hapi blong patna wetem olgeta mo sapotem kavman tu.
