Ol futbol maj oli muv aot long Port Vila Stadium i ko long Korman stadium folem renovation plan.
Presiden blong Port Vila Futbol Association, Harry Atison, hemi talem se folem manejmen blong Port Vila stadium ia, ofis i mas muv aot.
“Mifala i mas aot from Port Vila Municipality wetem Smat Konsalten oli manejem Port Vila Stadium, we hemi hom blong Port Vila futbol long taem finis i kam sins 1980,” Atison i talem.
Chief Executive Ofisa blong Vanuatu National Sports Commission, Trevor Toka, hemi talem se futbol association long Port Vila i stap anda long olgeta mo bai oli lukluk long hem.
“Futbol hemi stap gro, mo hemi gat ol konsisten program evri wik,” Mr Toka i talem.
“Nating se i gat shotej blong fil, be yumi no mas stopem be kontiniu blong sapotem spot ya.”
Hemi talem tu se sports commission i wantem wok wetem futbol mo ol nara spot federesen blong bildim olgeta mo gat wan gud relesensip wetem olgeta.
Port Vila City Council hemi talem se hemi legal owna blong Port Vila Stadium, anda long wan agrimen we hemi saenem wetem Vanuatu National Sports Commission.
Kontrak ya hemi blong fo yia, mo bai hemi finis long October 2025.
“Anda lo kontrak ia, hemi kat ol kondisen we hemi alaoem council blong hemi mekem sam developmen insaed lo stadium mo hemi stat blo mekem financial komitmen finis blong apliftem fes blong stadium we hemi stap long vicinity blo Port Vila City. Wan long ol core objectiv hemi blong meintenem stadium i ko antap long wan gudfala standard, blong alaoem ol stakeholda olsem Port Vila Football association, i enjoyem environmen blong stadium taem oli kam blong yusum ol fasiliti,” Port Vila City Council i talem.
Stetmen ya i talem tu se i bin gat re-planting blong grass long ol past wik, afta we ol kaontri tim blong MSG Cup, i yusum fil blong trening.
Kaonsel i stetem se stadium ia i mas mitim ol intanasonal rikuaimen, blong ol sista city futbol i save kam tekpat long wan kompitisen.
Ofis blong clerk long Port Vila City Council, i talem se hemi delayem ol maj long las wiken, from meintenens blong stadium, be hemi no stopem ol maj.
“Clerk i wantem mekem clarification tu se ceremony we Hon. Lord Mayor i mekem wetem Port Vila Futbol Association hemi blong kivim asurens long olgeta se oli stil save yusum stadium, be i no hand ova stadium lo olgeta. PVCC hemi karem ful raet ova long stadium management, mo mbae hemi alaoem ol nara sports federesen tu i save yusum olsem rugby, Business Houses mo i gat standard mo prosija blong yumi yusum stadium we evriwan i mas folem,” Port Vila City Council i talem
Port Vila City Council i stetem se bai hemi introdusum ward kompitisen, afta we kaonsel i mekem konsaltesen long ol faev ward long ol taem i stap kam.
