Wan niu health senta we i araon VT35 million i open long Avunatari, West Malo long wik ia.
Hemi wan longtaem krae blong ol pipol blong Malo blong i mas kat wan extension long olfala health senta. Drim ia i ajiv taem Minista blong Helt, Bruno Leingkone mo High commissioner blong Australia Her Excellency Heidi Bootle i openem niufala health senta ia long Tuesday wik ia.
Malo Memba blong Palemen, Wesley Rasu i talem tankiu blong mekem drim ia i kam tru.
“Ol pipol blong Malo oli glad from wan seves we i kasem olgeta,” Mr Rasu i talem.
Minister Leingkone i talem se health senta ia bambae hemi providem ful seves blong health.
“Health senta ia bae i provaedem ol seves blong general outpatient, maternity mo child health, klinic blong Non-Communicable Disease, vaccination, spesel klinic blong eye, nose, laboratory, mental health mo ol pikinini,” Minista Leingkone i talemaot.
Her Excellency, Heidi Bootle i askem komuniti blong lukaotem gud health senta ia.
“Health senta ia i impoten tumas long society blong yumi blong helpem ol famili so mi hop se yumi wok tugeta blong meintenem bilding ia,” Ms Bootle i talem.
Wok blong bildim health senta ia i bin stat long March 2021 mo i vinis long May 2022.
Niufala health senta ia i open wetem wan niu staff haos.
