Kol blong ol skul i nomo yusum ol botel gas olsem skul bel afta we wan Headmasta i lusum laef long Malekula tete.
Leit Iven Meltekli, Headmasta blong Tautu Primary skul(Central Malekula) i ded tete moning taem we botel gas we oli yusum olsem skul bel i posta.
Malampa Principal Education Ofisa, Renjo Samuel i talem se instraksen i ko aot blong ol skul i nomo yusum ol botel gas blong singaotem ol skul pikinini.
“Hemi wan lessen mo mifala i wok naoia blong faenem wan nara wei blong singaot ol pikinini i kam long skul mo nomo botel gas,” Mr Samuel i talem.
“Long tete moning, leit principal hemi ko ringim bel blong sam taem, wan hit blong bel i kosem bel blong posta mo i kosem bigfala kil long bodi blong hem.
“Komuniti i ron i kam mo mifala i transpotem hem i ko long hospital be folem bigfala kil we hemi kat hemi lusum laef.”
Mr Samuel, i talem se bottle gas ia oli hangem long foret blong ol klasrum.
Dr Josefa Tokon long Norsup Hospital, Malekula i talem long VBTC Nius se man ia i bin lusum plante blad mo hemi stap long wan kondisen oli kolem Severe Hypo-volemic shock.
Dr Tokon i talem se hemi long admit eli moning long hospital.
“Wanem ol famili i talem long mi se hemi wan gas cyclinda. Taem hemi admit long hospital long eli moning hemi laef yet be blad presa i drop bigwan. Hemi bleed tumas nao mo hemi ko long state blong shock.
Dr Tokon i talem se hemi bin dil wetem kaen insiden olsem long Vila long taem trening blong hem be hemia i wan worst wan.
“Ating long las 12 manis long Vanuatu hemia hemi seken wan vinis long wan plast injury long ol gas cyclinda,” Dr Tokon i talem.
“Hemi no sef nomo blong yusum from yumi nosave se ol cyclinda ia oli fulap o empty gud.”
Sam lokol long Lakatoro i talem se oli bin harem loud noise blong posta ia tete moning.
Gas Technician, John Kaltabang i talem se sapos wan botel gas i stap long wan environmen olsem hemi expos long heat o faea hemi save posta.
Mr Kaltabang i talem se gas i nosave posta olsem nomo.
“I mas kat wan leak insaed long haos; Air, Fuel mo heat hemi ol tri factor we i save mekem explosen,” Mr Kaltabang i talem.
Mr Kaltabang i biliv se wan oxygen gas botel i mekem explosen.
“Ol botel gas ia oli kat moa presa from oli 800 Kilopascal,” Mr Kaltabang i talem.
“I kat ol difren kaen botel gas; Ol Liquefied Petroleum gas oli yus long saed blong kuk mo oli neva posta. 270 hemi Kilopascal blong hem.
“Ol botel gas oli laef blong sam yia nomo mo taem oli expae, yumi mas aotem mo nomo yusum.”
Dokta Tokon i serem bigfala sori i ko long famili long sad taem ia from oli nosave abol blong stabolasem hem.
Eria Administa blong Not West Malekula, Jerryson Hosea i talem se Malampa mo Matanvath vilij i lusum wan risos tija.
“Hemi wan aksiden we yumi nosave bilivim blong i hapen mo mifala i sori,” Mr Hosea i talem.
