Kavman tru long Ministri blong Helt i stap plan blong reloketem Norsup Hospital long Malekula folem level blong solwota we stap kam insaed mo spolem building.
Klaemet jenjs hemi wan risen from wanem nao solwota stap muv kam antap mo hemi putum Norsup Hospital long wan hae risk naoia.
Acting Direkta Generol blong Ministri blong Helt, Dr Samuel Posikai Tapo, i talem se long las 6 tu 7 yia oli jes lukim wan bigfala jenj long saed blong solwota weh i muv kam long land.
“Yumi traem blong tekem isu ia blong kasem level blong Kavman blong yumi save alokatem wan graon we stap longwe long solwota blong hemi no kat impak long sea level rise,” hemi talem.
DG Tapo hemi tok moa se solwota hemi spolem ruf mo iron mo mekem i roten.
“Hemi wan bigfala problem mo bae yumi traem had blo fixim be only wei emi blong reloketem Norsup Hospital.”
Wan ripot long saed blong helt facilities long Pasifik kantri hemi talem se hospital ia hemi stap long 6 meters antap long sea level mo 25 meters long wei long solwota.
Ministri blong Helt mo ol depatmen blong hem bae oli wok long wan Masta Plan long nekis yia long June blong rispon long isu we istap mo finem ol wei fowod blong reloketem Norsup Hospital.
“Pat blong Masta Plan blong yumi luk wanem seves nao bae yumi save sapotem Norsup Hospital mo long saed blong hamas mane nao bae Kavman bae i spendem blong relokatem mo expandem helt senta ia.”
Dr Tapo i se i kat ol nara helt senta tu we oli stap long hae risk olsem Port Olry long Santo mo Akam long Saot Malekula.
“Yumi stap putum ol nara helt senta tu we oli stap fesem sea level rise long niu bajet blong adresem klaemet jenj.”
Hemi talem se i kat sam aid post tu long Torres we i stap fesem semak problem.
“Tru long sapot blong ol developmen patna we oli adresem klaemet jenjs long Pasifik bae yumi traem usum alokesen blong mane ia blong helpem ol helt senta blong yumi we oli stap long risk blong sea level rise.”
Malampa Provinsal Public Helt Manager Salome Kenneth i konfemem se solwota ikam andap kolosap long hospital ia.
“Long Norsup Hospital yumi save lukim solwota hemi digim aot ol roots blong ol oak tri mo hemi kam antap tumas bitim bifo, mo tu i kasem men rod long ket blong hospital.”
Pat long Helt Masta Plan blong nekis yia bae oli lukluk tu blong mekem ol asesmen long ol nara aelan raon long Vanuatu blong finem ol nara helt senta we bae oli fesem impak blong sea level rise.
