Depatmen blong Yut mo Spots hemi talem se Kavman hemi plan blong bildim wan hae pefomens senta blong evri spotman mo woman oli save tren lem.
Direkta Jenerol blong Yut mo Spots, Russel Tamata, hemi talem se oli wantem sapotem evri spots mo traem putum olgeta evriwan long semak level blong perfomens.
“Evri kantri long Saot Pasifik oli kat hae pefomens senta blong olgeta be Vanuatu mo Fiji hemi nogat,” hemi talem
Direkta Jenerol hemi tok moa se pa hae pefomens senta ia emi helpem fulap atletiks mo spots maneja blong trening lem mo pa oli kat akses long plante samting blong impruvum gem blong olgeta.
“Kavman blong tudei tru long Honorabel Minista hemi lukluk long SPG2023 osem ol leson blong lanem blo yumi impruvum spots long kantri mo pa hemi stap blong plans blong Kavman blong finem wan wei fowod blo mek sua se nekis gem yumi redi gud.”
Vanuatu Gol wina blong tebol tenis, Anolyn Lulu hemi talem tu se Tebol Tenis Federesen hemi nidim wan ples blong trenin lem.
“Mifala nidim wan ples blong mifala from se tebol tenis hemi wan long ol spots blong kantri we sta winim fulap medol long hamas yia we i kam.
“Naoia mifala sta tren nomo long Korman Stadium be hemi taim nao we mifala mas kat wan spots aos blong mifala save tren moa lem.”
Wan spots volentia blong JICA, Itomi Ryosuke hemi kam wok wetem tim blong atletiks long Saot Pasifik Gem long 2023, hemi talem se ol spotsman blong Vanuatu oli kat fulap talent be nidim wan gudfala infastrakja blong sapotem olgeta.
“Taem yumi muv slo pa yumi givim taim long nara kantri blong develop bitim yumi,” hemi talem
Pa hae pefomens senta ia hemi stap long plan blong Kavman blong helpem spots blong yumi long kantri.
