Saturday, July 13, 2024
24.8 C
Port-Vila
Saturday, July 13, 2024
More

    Futuna i kasem help blong kakai

    Ol pipol long aelan blong Futuna i stap kasem sam help finis long gavman mo ol patna blong hem. 

    Hemia afta we i bin gat sik bunbun mo plante sevis i mas klos from ino bin gat inaf kakai, afta long saeklon Judy mo Kevin long eli yia ya. 

    Futuna i wan long ol aelan we saeklon Judy mo Kevin i bin damejem bigwan eli long yia ia.

    Eli long Oktoba manis ya, i gat ripot se i nogat inaf kakai. 

    Long Fraedei moning sip blong Kiwi Trader i mekem wan daerek trip blong CARE International long Port Vila igo long Futuna. 

    Eria sekretari blong Eria Kaonsel long aelan ya, Toka Iatipu, i talem se daerek trip ya, i saplaem ol tul tu blong statem karen. 

    Hemi talem se CARE International i sapotem Futuna wetem faef smol nurseri o haus blong planem ol kakai.

    “Ino nurseri nomo, oli givim sam seedling (smol plant blong kakai), ol planting material (tul blong mekem garen) we oli kam daon blo yumi distributum (serem) i golo ol haushol,” Mr Iatipu i talem.

    “And narafala planting tools tu oli givimaot blo yumi serem i golo ol haushol. Igat ol shelta tul we oli sta putumaot. 

    “Mifala i glad we oli pasem ol tul blo mifala mekem ol garen. Oli pasem ol sidling. So, ol pipol oli plan.”

    Hemi talem se dipatmen blong lokol otoriti mo ol famili blong Futuna long Port Vila, i bin saplaem tu ol kakai igo long Futuna.  

    “Mifala i rili acknowledgem Dipatmen blong Lokol Otoriti anda long Ministri blong Internal Affairs we emi bin pikimap ripot ya, mo emi jatarem fes jata lo las manis, blo helpem ol famili blo yumi lo Futuna blo oli save putum smol kakai,” Mr Iatipu i talem. 

    “Ol hardware lo Vila wetem ol bisnis haus (lo Port Vila) oli alaowem blo putum lo jata ya. 

    “Jata ya i mekem se yumi re-openem ol sto bakeken, blo ol man oli save karem smol kakai lo sto. I gat smol kakai yet, i save kasem eli disemba. 

    “Ol famili (lo Port Vila) oli bin putum fulap kakai tu igo lo ol haushol.” 

    Helt senta blong Futuna i no moa ripotem sik bunbun. 

    “Nes blo mifala emi se no, naia ino moa gat malnutrition (sik bunbun). Malnutrition naia yumi sta fogetem. Hemi kam tru long saed blo kakai. 

    “Wetem jata blo DLA (Dipatmen blong Lokol Otoriti) i kam daon ya, ol man oli kasem smol kakai finis. Oli kakai wetem smol grin kakai lo garen,” Mr Iatipu i talem. 

    Hemi talem se pipol i harem gud bakeken wetem stok blong kakai we i stap long aelan naoia.  

    Oli talem se saplae blong kakai ya i save holem taet olgeta, kasem neks manis we bai oli havestem ol kakai long karen. 

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen