Vanuatu Kavman i sta wok blong openim rod blo karem ol niu trak we pa no ron long fuel be pa usum jarja blong elektrisiti blong operet long kantri.
Projek ia we Globol Grin Grot Institut (GGGI) tru long Depatmen blong Enegi long Ministri blong Klaemet hemi sta wok lo hem, hemi blong finem wan niu rod blong stopem ol trak we oli mekem tumas toti gas we sta spolim enviromen blong yumi tudei, mo tu from praes blong fuel i hae tumas.
Wan offisa blong GGGI, Jesse Benjamin hemi talem se projek ia pa tekem wan yia blong oli plan gud bifo oli sendim finol ripot nekis yia long manis blong Maj blong i kolo Globol Enviromen Fasiliti (GEF) mo United Nasen Enviromen Prokram (UNEP), blong oli save kivim VT1 milen long Vanuatu Kavman blong yumi save statem projek ia long Vanuatu.
“Fulap kantri raon long wol oli sta usum ol elektrik trak finis be yumi long Vanuatu, Kavman hemi jes stat blong openim rod blong yumi usum ol niu trak ia be yumi sta wok slo yet blong finisim ol ripot,” hemi talem
“Ol wei fowod blong projek ia emi blo yumi mekem ol awenes raon long aelan blong ol pipol oli mas save wanem nao niu trak ia we oli signaotem se elektrik vehikel (EV) mo hao nao pa hemi helpim yumi long Vanuatu.
“Pa mas kat ol trenin tu long ples blong fixim trak blong ol wokman oli lanem hao blong fixim wan EV we pa hemi diferen long ol nara trak.”
Hemi talem se ol EV ia pa save usum sola jarja tu mo pa i mo isi sos u jarjem long aos blong yu bitim aotside long ol jarjing stasen we pa Kavman mas bilidm raonem Pot Vila town.
Offis blong SHEFA Pablik Lans Transpot Asosiasen (PLTA) emi talemaot tu se pa Kavman blong yumi hemi mas step insaed blong mekem se pa nogat problem wetem praes blong fuel mo praes blong elektrisiti blong jarjem trak.
“Sos yumi komparem mane we pa oli mas putum aot blong bildim ol stasen blong jarjem ol niu trak ya mo ol fuel stasen pa luk se mane emi mo bigwan mo pa kat wan nid blong Kavman e step insaed blong protektem infastrakta blong kantri mo hemi no mekem e paspas tumas wetem ol nara kampani we sta salem trak naoia.”
Long rispons ia, Mr Benjamin hemi explenim se long saed blong praes diferens blong fuel mo elektrisiti pa hem mo tim blem i putum tu long ripot blong finem wan wei blong sapotem UNELCO mo tu blong savem mane blong yu blong yu save se wij wan nao emi mo jip blong pem.
Mo tu hemi talem se taem taim oli finisim ol ripot pa yumi mas wet kasem nekis yia long manis blong Septemba blong harem se olgeta long GEF mo UNEP oli agri wetem ripot mo pa oli sendim mane e kam blong yumi statim projek blong karem ol niu trak ia kam long Vanuatu.
Pa projek blong EV we stap anda long GGGI pa hemi wok wetem ol Praevet Sekta, olgeta long PLTA Offis, Depatmen blong Pablik Woks, Ministri blong Infastrakta, Kastoms, Nasenol Grin Enegi Fan (NGEF), UNELCO mo tu ol bigfala kampani blong salem trak olsem Asco mo Intraco.
