Santo Sunset Enviromen Netwok (SSEN) hemi patna wetem Red Cross Vanuatu blong ranem wan woksop blong disasta rispons long olgeta Komuniti Disasta Klaemet Jenj Komiti long Santo.
SSEN Jeaman Allan Taman hemi talem se emi wan 2 wik woksop long olgeta eria kaonsel long Northwest, West Coast mo Southwest blong helpem komiti blong save wanem wok oli sapos blong stap mekem long taem blong wan disasta.
“Pepos blong yumi ranem refresa course bakken wetem ol klaemet jenj komiti hemi from se SSEN hemi setem ap ol komiti ia and then hemi jes ko tru wetem olgeta long ol asesmen fom but hemi no ko in detail insaid long hao wan disasta komiti hemi sud mekem wan ripot afta long wan disasta,” Hemi talem.
Mr Taman i talem se olgeta pipol long disasta komiti oli kivim ol gudfala fidbak mo i soem se refresa ia i helpem olgeta blong lanem ol niu samting long saed blong disasta rispons.
“Olsem jeaman blong SSEN mi tu mi jes lanem mo mi jes save wanem nao ol stret wok blong olgeta disasta komiti mo olgeta senario.”
Woksop trening ia i stap long Nambeko long Northwest, Tovotovo long Southwest mo Kerebua long West Coast mo bae finis long end blong wik ia.
