Rapis Weta hemi kosem delei blong muvum ol ballot box long Sanma.
2 ballot box blong tufala poling staisen long inlan Santo i nosave kasem Luganville yet.
Tufala polling station ia I kat Shaktui mo Tamburi weh i stap inlan long aelan blong Santo.
Sins eleksen dei hemi pas, weta hemi kam nogud i mekem olgeta Polis ofisa i nosave leko tufala poling staisen ia wetem ol ballot box from ol bigfala riva weh oli mas krosem.
VBTC nius i karem konfomesen long Komanda Nod George Songi , seh Electoral Komisen hemi awea vinis long situesen ia, mo oli stap wait blong tufala ballot box ia i kam tru mo oli saveh completem officol kaonting.
“Santo hemi kontinu blong risivim hevi rein long Santo, mo bae hemi stap nao long Elektrol Komisen blong karem wanem advaes bae yumi saveh usum blong mekem sua seh ol infomesen weh yumi karem long Big Bay i saveh kasem mein lan blong yumi saveh finisim kaonting blong letem pablik hemi saveh ol aotkam blong ol eleksen blong yumi long provins .”
Hemi go hed blong talem seh wetem weta weh i stap bambae ol ofisa ia i no mas jalensem blong krosem ol riva from bambae hemi tu riski long olgeta.
“Mifala asurum olgeta seh ufala i no jalenjem riva from weta hemi neija, yumi nokat kontrol long hem, hemi aot of kontrol so riva hemi big wan tumas mo bae oli no saveh kasem yumi long taem blong yumi saveh finisim ol kaontings, naoia weh yumi stap wet yet i depen long weta.”
Afta weh tufala ballot box ia bambae i kam kasme Luganville bambae Elektoral Komisen i jes declerem nem blong wining kandideit long Sanma Provincial kavman.
